Qashqadaryo viloyati ekologiya boshqarmasi tomonidan Kasbi tumanida navbatdagi reyd tadbirlari o‘tkazildi. Bu haqda boshqarma matbuot xizmati xabar berdi.
Reyd davomida To‘palang HPD Holding MChJ mas’ullari tomonidan Denov—Novqat kanalini rekonstruksiya qilish jarayonida kanal qirg‘og‘iga ekilgan jami 150 ta daraxt ildizi bilan qo‘porilgani aniqlangan. Bu bilan «Respublikada ko‘kalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari to‘g‘risida»gi farmon talablari buzilgan.
Daraxtlarni kesish yoki ko‘chirib o‘tqazish bo‘yicha amaldagi tartiblarga rioya etilmagan va murojaat qilinmagan.
Daraxtlar kesilishi natijasida o‘simlik dunyosiga 1 milliard 165 million 350 ming so‘m zarar yetkazilgan.
Hujjatlar yetkazilgan zararni undirish hamda aybdorlarga qonuniy chora ko‘rish maqsadida Qashqadaryo viloyati prokuraturasiga yuborilgan.
