Bunday fuqarolar joylarga o‘rnatilgan kuzatuv kameralari orqali aniqlanmoqda.
Samarqand viloyatida belgilanmagan joyga chiqindi tashlagan shaxs jarimaga tortildi. Bu haqda viloyat ekologiya boshqarmasi xabar bermoqda.
Ma’lum qilinishicha, 2024 yil 31 yanvar kuni Samarqand tumani “Yangiariq most” MFY hududida fuqarolardan biri Damas mashinasida kelib belgilanmagan joyga chiqindi tashlagan.
Samarqand shahar davlat inspektorlari tomonidan qoidabuzar shaxsga MJtKning 91-moddasi 1-qismi bilan 1,7 mln so‘m jarima qo‘llangan.
Fuqaroning bu qoidabuzarligi o‘sha atrofga o‘rnatilgan kuzatuv kamerasiga tushib qolgan.
Qayd etilishicha, so‘nggi paytlarda atrof-muhit tozaligini saqlash maqsadida Samarqand shahri va viloyatning turli hududlarida aholi gavjum joylarda kuzatish kameralari o‘rnatilmoqda.
Birgina Samarqand shahrida bunday kameralardan 25 dona o‘rnatildi. 2024 yil so‘ngigacha viloyat hududida 100 ta kamera o‘rnatish rejalashtirilgan.
Ma’lumot uchun, belgilanmagan joylarga chiqindi tashlagan fuqarolar va avtomashinalar egalariga nisbatan BHMning 3 barobaridan 10 barobariga qadar ma’muriy jarima qo‘llanadi.
