“Manzil” loyihasi oxirgi ko‘rsatuvlarida asosan tabiat qo‘ynida yashayotgan jonivorlar haqida hikoya qilib keldi. Bu gal esa ularni juda-juda yaqindan: hayvonot bog‘ida turib tomosha qilamiz.
Ko‘pchilik Toshkent hayvonot bog‘idagi xilma-xillik uncha katta emas deb o‘ylaydi. “Manzil” ko‘rsatuvini ko‘rib, bog‘da hayvonlarning siz bilmagan turlari va ko‘plab jarayonlarga guvoh bo‘lasiz.
Bu yil 100 yoshga to‘lgan Toshkent hayvonot bog‘i – ilmiy tadqiqot ishlari olib boradigan muassasa. U 1924 yilda 3 gektar maydonda O‘rta Osiyo universiteti biolog olimlari tashabbusi bilan sobiq Turkiston general gubernatorining shahar chekkasidagi dala hovlisidagi kichik hayvonot burchagi negizida tashkil etilgan.
Bog‘ 1940-yillar oxirida 200 turdan ortiq hayvonlar jamlangan hayvonot bog‘iga aylandi. O‘zbekiston hukumati qaroriga ko‘ra, 1994–97-yillarda Toshkent hayvonot bog‘i uchun barcha zamonaviy talablar va standartlarga javob beradigan yangi hayvonot bog‘i qurildi. Botanika bog‘i yaqinida joylashgan mazkur hayvonot bog‘iga 1997 yil 1 sentabrda Toshkent hayvonot bog‘i ko‘chib o‘tgan.
Hozirda hayvonot bog‘ida 400 ga yaqin hayvon turlari saqlab kelinmoqda.
Tohirjon Tursunov,
Kun.uz'ning “Manzil” loyihasi uchun maxsus
