Toshkentda oilali ayolga shahvoniy shilqimlik qilgan avtobus chiptachisi qamaldi 

4 mart kuni Toshkent shahar jinoyat ishlari bo‘yicha Uchtepa tumani sudida yo‘lovchi ayolga jinsiy aloqada bo‘lishni taklif qilgan 9t-sonli avtobusning chiptachisiga sud hukmi o‘qildi.

Gazeta.uz xabariga ko‘ra, sud majlisida ayol 9t-sonli avtobusda chiptachi vazifasida ishlab kelayotgan 1996 yilda tug‘ilgan I.A. unga bir necha marotaba sha’ni va qadr-qimmatini tahqirlaydigan gaplarni aytgani, unga oilasi borligini aytishiga qaramasdan, birga jinsiy aloqada bo‘lishni taklif qilganini bildirib, unga nisbatan qonuniy jazo berishni so‘radi.

Sud majlisida I.A. yuqorida ko‘rsatilgan huquqbuzarlik harakatiga to‘liq iqrorligi, qilgan ishidan pushaymonligini bildirib, yengillik berishni so‘radi.

Sud I.A.ga nisbatan Ma’muriy javobgarlik to‘g‘risidagi kodeksning 41−1-moddasining 1-qismida (Shahvoniy shilqimlik) nazarda tutilgan huquqbuzarlikni sodir qilganlikda aybli deb topildi va unga shu moddaga asosan 3 sutka ma’muriy qamoq jazosi tayinladi.