"Dunyo" xabariga ko‘ra, muloqot chog‘ida O‘zbekiston iqtisodiyoti va sanoati tarmoqlariga to‘g‘ridan-to‘g‘ri xorijiy investitsiyalarni jalb etish masalalari ko‘rib chiqildi. O‘zbekistonda qurilish materiallari ishlab chiqarish, uy-joy kommunal xizmat ko‘rsatish va servis markazlarini barpo etish sohasidagi o‘zaro manfaatli investitsiya loyihalari va ilg‘or tashabbuslarni amalga oshirishning amaliy jihatlari muhokama qilindi.
Tomonlar mamlakat aholisining jadal o‘sishini hisobga olgan holda O‘zbekistonda qurilish industriyasi va arxitekturasini rivojlantirish uchun sarmoyaviy, savdo-sanoat kooperatsiyasini kengaytirishdan manfaatdorlik bildirdi.
Germaniya tomoni ishlab chiqarish quvvati va konstruksiyalarning sifatini oshirish maqsadida O‘zbekiston qurilish sohasiga eng yangi texnologiyalarni joriy etishga sarmoya kiritishga tayyorligini bildirdi.
