Vengriya YeIning migratsiya qoidalaridan voz kechmoqchi

Vengriya Niderlandiya ortidan Yevropa Ittifoqi migratsiya qoidalariga rioya qilishdan bosh tortish niyatini e’lon qildi. Bu haqda 18 sentabr, chorshanba kuni Vengriya Yevropa ishlari vaziri Yanosh Boka ma’lum qildi.

«Noqonuniy migratsiyaga qarshi qat’iy choralar ko‘rish kerak», deb yozgan vazir X ijtimoiy tarmog‘idagi sahifasida. Shu sababli Budapesht Yevropa Ittifoqining boshpana bo‘yicha qoidalaridan chiqish uchun Yevrokomissiyaga murojaat qilmoqchi. Avvalroq Niderlandiya Yevropa idorasiga xuddi shunday so‘rov yuborgan edi. Niderlandiyaning eng yirik o‘ng qanot populistik Ozodlik partiyasi (PVV) rahbari Gert Vilders «bu yangi shamol esib borayotganidan dalolat», dedi.

Niderlandiya va Vengriya o‘z tashabbusi bilan muvaffaqiyat qozonishi dargumon. Ushbu davlatlarni Yevropa Ittifoqi migratsiya tizimidan chiqarib tashlash uchun uning barcha 27 a’zosining roziligi talab qilinadi.

Bosh vazir Viktor Orban boshchiligidagi Vengriyaning o‘ng qanot populistik hukumati ko‘p yillardan beri muhojirlarga qarshi siyosat olib boradi va shuning uchun Yevropa komissiyasi bilan doimiy ziddiyatda. Budapesht ayni damda Yevropa sudi tomonidan o‘zining cheklovchi boshpana siyosati tufayli qo‘yilgan 200 million yevro miqdoridagi jarimani to‘lashdan bosh tortmoqda. Shuning uchun Bryussel bu pulni Yevropa Ittifoqining Vengriyaga bo‘lajak to‘lovlaridan olib qo‘ymoqchi.