Bahodir Jalolovning professional boksdagi navbatdagi raqibi ma’lum bo‘ldi

2025 yil 6 fevral kuni Kanadaning Monreal shahrida professional boks oqshomi tashkil etiladi. Unda superog‘ir vazn toifasida Bahodir Jalolov ham ringga ko‘tariladi. Unga fransiyalik Devid Spilmont raqiblik qiladi, deb xabar berdi O‘zbekiston professional boks federatsiyasi.

Bahodir Jalolov professional boksdagi faoliyati davomida hozirga qadar 14 ta jang o‘tkazib, barchasida g‘alaba qozongan. So‘nggi jangini 2023 yil 17 noyabr kuni Toshkentda JAR vakili Kris Tompsonga qarshi o‘tkazib, ilk raunddayoq nokaut orqali zafar quchgandi.

Uning bo‘lajak raqibi Devid Spilmont shu kungacha 27 ta jang o‘tkazib, 16 g‘alaba, 8 mag‘lubiyat va 1 ta durang qayd etgan. G‘alabalarining 11 tasini nokaut orqali qo‘lga kiritgan.

Shu bilan birga, boks oqshomida o‘zbekistonlik Artur Biyarslanov va fransiyalik Muhammad Mimun o‘rtasida ham jang bo‘lib o‘tadi.