O‘zbekistonda mahalliylashtirish hisobiga BYD'larning tannarxini pasaytirish rejalashtirilmoqda

Prezident Shavkat Mirziyoyev 5 dekabr kuni avtomobil sanoatida 2025 yil uchun ustuvor vazifalarga oid taqdimot bilan tanishdi.

Bu masala bundan 10 kun oldin, 25 noyabr kuni ham muhokama qilingan, mutasaddilarga rejalarni tanqidiy ko‘rib chiqish topshirilgan edi. Bu galgi taqdimotda prezident ko‘rsatmalari asosida takomillashtirilgan chora-tadbirlar bayon qilindi, deya xabar bermoqda davlat rahbarining matbuot xizmati.

Qayd etilishicha, avvalo ishlab chiqarish hajmi va sifatiga e’tibor qaratiladi. Hozir yiliga 400 mingdan ziyod avtomobil sotilyapti. Bu tendensiya keyingi yillarda ham saqlanib qoladi.

“Qolaversa, O‘zbekiston Jahon savdo tashkilotiga a’zo bo‘lishi kutilmoqda. U holda, bozorda mahalliy ishlab chiqaruvchilar uchun raqobat yanada kuchayadi. Shuning uchun sifat ustida ishlash, mahalliylashtirish darajasini oshirish zarurligi ta’kidlandi”, – deyiladi xabarda.

Qayd etilishicha, 2025 yilda BYD avtomobillarining 60 ta detalini mahalliylashtirish hisobiga elektromobil tannarxini pasaytirish mumkin. Bu kompaniya rahbariyati ham O‘zbekistondagi tarmoq korxonalari salohiyatini yuqori baholagan. Shu bois Mahalliylashtirishga ko‘maklashish markazi imkoniyatlarini ishga solib, hududiy korxonalar bilan kooperatsiya hajmini 2 karra oshirish vazifasi qo‘yildi.

“Yana bir muhim masala – eksport. So‘nggi yillarda qo‘shni davlatlarda ishlab chiqarish yo‘lga qo‘yilgani natijasida 40 mingdan ortiq avtokomplekt sotilgan. Kelgusi yil eksportni 700 mln dollardan oshirish maqsad qilingan. Shu bilan birga, Samarqanddagi avtobus va yuk transporti korxonalarini ham tashqi bozorlarga olib chiqish kerakligi ko‘rsatib o‘tildi”, – deyiladi rasmiy relizda.

Qo‘shimcha qilinishicha, prezident zamon talablariga moslashib, ishlab chiqarishni barqaror qilish, marketing va sifat bo‘yicha har kuni izlanish zarurligini ta’kidlagan.