Latviyada FBK da’volari tekshirilgach korrupsiya aniqlanmadi

Latviya Korrupsiyaning oldini olish va unga qarshi kurashish byurosi (KNAB) Korrupsiyaga qarshi kurash fondi (FBK) hujjatli filmida keltirilgan ayblovlarni o‘rganib chiqdi va Latviya rasmiylari orasida korrupsiyaga oid dalil topmadi. Bu haqda 15 dekabr, yakshanba kuni Delfi portali prokuraturaga tayanib xabar berdi.

KNAB idoraviy tekshiruv o‘tkazdi va davlat politsiyasi va prokurorlari tomonidan sodir etilishi mumkin bo‘lgan jinoyatlarni ko‘rsatuvchi faktlarni aniqlamadi.

Muxolifatchi Aleksey Navalniy jamoasi Latviya huquq-tartibot idoralari xodimlari YuKOS neft kompaniyasi rahbariyatining sobiq vakili Leonid Nevzlinga pora evaziga rossiyalik muxolifatni ta’qib qilishda yordam berayotganini da’vo qildi.

Navalniy tarafdorlarining filmi

Navalniyning tarafdorlari filmida aytilishicha, Leonid Nevzlin FBK rossiyalik muxolifatchilarga hujum tashkilotchisi deb hisoblagan advokat Anatoliy Blinov bilan birga Latviyada FBK sobiq bosh direktori Vladimir Ashurkovga nisbatan pora evaziga jinoiy ish ochmoqchi. 

Latviyaning LTV telekanaliga ko‘ra, Blinov Latviya fuqarosi bo‘lmagan shaxsning soxta pasportidan foydalanib, Yevropa Ittifoqi bo‘ylab harakatlangan. Shu munosabat bilan Latviya Ichki ishlar vazirligi davlat kotibi Dmitriy Trofimov politsiya «hujjatlarni qalbakilashtirish ehtimoli bo‘lgan faktni tekshirish uchun barcha zarur choralarni ko‘rishini» va’da qildi.

FBK poraxo‘rlik ayblovlariga ishonmasligini ta’kidladi, biroq Ashurkovning o‘zi ularga mart oyida u go‘yo London politsiyasiga guvoh sifatida chaqirilganini, u yerda uni Latviya politsiyasi tergovchilari va Riga tuman prokurori britaniyaliklar bilan birga so‘roq qilishganini aytdi, deb yozadi Delfi.

Portal ma’lumotlariga ko‘ra, Ashurkovning o‘zi Latviya OAVga boshqa ma’lumotlarni, ya’ni Latviya huquq-tartibot idoralari tomonidan qasr sotib olingani haqida so‘roqqa tutilganini aytgan.