Moskva aeroportida Rossiya ta’lim vazirining sobiq o‘rinbosari qo‘lga olindi

Moskvadagi aeroportlarning birida firibgarlik ishi bo‘yicha federal qidiruvda bo‘lgan Rossiya ta’lim vazirining sobiq o‘rinbosari qo‘lga olindi. Bu haqda mamlakat Ichki ishlar vazirligi xabar berdi.

Idora qo‘lga olingan shaxsning ismini oshkor etmagan. Kuch tuzilmalariga yaqin bo‘lgan Telegramʼdagi «112» kanalining yozishicha, ushlangan shaxs 2024 yil avgust oyida o‘z xohishiga ko‘ra lavozimdan ketgan Denis Gribovdir.

Tergov versiyasiga ko‘ra, sobiq vazir o‘rinbosari sheriklari — bo‘ysunuvida bo‘lgan institutning sobiq prorektori, kadrlar tayyorlash sohasidagi kompaniya direktori va xodimi bilan Rossiya budjetidan kasb-hunar ta’limini rivojlantirish uchun ajratilgan mablag‘larni o‘g‘irlash sxemasini ishlab chiqqan. Ular pedagoglarga amaliyot o‘tashlari uchun davlat shartnomasini tuzgan, biroq ularni o‘tkazmagan.

«Ishning amalga oshirilganini tasdiqlash uchun sheriklar soxta hisobot hujjatlarini tayyorlagan. 54 million rubldan ortiq budjet mablag‘lari o‘zlashtirilgan va gumonlanuvchilar o‘rtasida taqsimlangan», — deyiladi IIV xabarida.

Ishga aloqador boshqa uch kishi ham ushlangan — ularning ham ismi oshkor etilmayapti.

Sobiq vazir o‘rinbosari Rossiyadan tashqarida «tergovdan yashiringan». Unga nisbatan ayblov va qidiruv e’lon qilingan. Sobiq amaldor mamlakatga uchib kelganida qo‘lga tushgan.