Farg‘onada bolaning hayotini xavf ostida qoldirgan enaga ustidan jinoyat ishi qo‘zg‘atildi

Farg‘onada o‘ziga ishonib topshirilgan ikki yarim yashar bolaga nisbatan beshafqat munosabatda bo‘lgan enaga ustidan jinoyat ishi qo‘zg‘atildi.

Bolalar ombudsmaniga xabarida aytilishicha, 2018 yilda tug‘ilgan qizaloq enagasining qaramog‘ida yashayotgan vaqtda, 15 noyabr kuni uydagi zinadan yiqilib, og‘ir jarohatlangan. Shunga qaramay, enaga bolaning sog‘ligini xavf ostiga qo‘yib, uni shifoxonaga olib bormagan. Oqibatda bolaga bosh miya lat yeyishi va boshqa xayot uchun xavfli og‘ir shikastlar tashxisi qo‘yilgan.

Ma’lum bo‘lishicha, Kun.uz ushbu voqea haqida xabar bergan kun – 28 dekabrda Farg‘ona shahar IIB 37 yoshli enaga ayol M.X.ga nisbatan “xavf ostida qoldirish” moddasi bilan jinoyat ishi qo‘zg‘atgan.

Qizchaning onasi – Farg‘ona shahrida yashovchi, turmushi buzilgan 37 yoshli M.G‘. 2024 yil avgust oyida Rossiyaga ishlash uchun ketib, 2018 yilda tug‘ilgan o‘g‘li va 2022 yilda tug‘ilgan qizini rasmiy ishonchnoma asosida M.X.ning qaramog‘iga qoldirgan; enagaga xizmat xaqqi va bolaning kunlik sarf-xarajatlari uchun pul jo‘natib turgan.

Kunlarning birida ona Rossiyadan turib bolalarning sobiq enagasi bilan bog‘langan va M.X. farzandlarini unga Telegram orqali ko‘rsatmay qo‘yganini aytib, ulardan xabar olishini so‘ragan. Ayol onaning iltimosiga ko‘ra bolalarni M.X.dan olgan vaqtida, qizcha og‘ir jarohatlangani ma’lum bo‘lgan. U Kun.uz bilan suhbatda qizning tanasida kaltak izlari borligi, 6 yoshli akasi ularni qiynashganini aytgani haqida so‘zlab bergandi.

RShTYoIM Farg‘ona filiali Bolalar qo‘shaloq tan jarohatlari bo‘limi shifokori G‘ayratjon Hotamov Kun.uz'ga muolajalardan keyin bolaning holati yaxshi tomonga o‘zgara boshlaganini aytgan.

“Bemor og‘ir holatda bo‘lgani uchun bolalar reanimatsiyasi bo‘limida yotqizilgan. U karaxt holatda edi. Uning bosh qismida kattagina shish bor edi. Peshona suyagi ham singandi. Qizaloqning boshidan yarim litrga yaqin yig‘ilib qolgan eski qonni olib tashladik. Bolaning bosh va tana qismlarida jarohat alomatlari bor edi”, – degandi shifokor.