Donald Tramp inauguratsiya marosimini Kapitoliy ichida o‘tkazishga qaror qildi

2025 yil 20 yanvarda Donald Trampning inauguratsiyasi Vashingtondagi Kapitoliy binosi tashqarisida emas, ichida bo‘lib o‘tadi. Bu haqda respublikachining o‘zi 17 yanvar, juma kuni TruthSocial ijtimoiy tarmog‘ida yozgan.

Trampning inauguratsiya kunida Vashingtondagi ob-havo

Trampning aytishicha, AQSh poytaxtida 20 yanvar kuni sovuq Arktika shamollari va «rekord past haroratlar» kuzatilishi kutilmoqda. Meteorologiya xizmati ma’lumotlariga ko‘ra, dushanba kuni Vashingtonda havo harorati kunduzi -5°C, kechasi esa -12°C gacha pasayadi.

Respublikachining fikricha, bu minglab favqulodda vaziyatlar xodimlari va marosim tomoshabinlari uchun xavfli bo‘lishi mumkin. «Men odamlarning hech qanday zarar ko‘rishini yoki jarohatlanishini xohlamayman, - deb yozgan saylangan prezident. - Shuning uchun men inauguratsiya nutqi, shuningdek, boshqa nutqlar Kapitoliy rotondasida aytilishini buyurdim».

Donald Tramp Capital One Arena poytaxt stadionida tomoshabinlar uchun marosimning jonli efiri tashkil etilishini qayd etdi. Prezidentning o‘zi tarafdorlarini kutib olish uchun lavozimga kirishgach, u yerga kelishga va’da bergan.

Vashingtondagi Milliy alleyada, marosim o‘tkazilishi rejalashtirilgan Kapitoliy zinapoyasi oldida allaqachon minglab stullar o‘rnatilgan, deb xabar beradi AFP. Endi ular kerak bo‘lmaydi. Kapitoliy rotondasidagi zalning o‘zi bir necha yuz kishini sig‘dira oladi, deya ta’kidlaydi agentlik.

AQSh prezidenti inauguratsiyalarida sovuq ob-havo

Odatda, AQSh prezidentining inauguratsiya marosimi Kapitoliy binosi oldidagi ko‘chada bo‘lib o‘tadi. Masalan, Tramp 2017 yil 20 yanvarda lavozimga kirishganida ham shunday bo‘lgan. Respublikachining o‘zi eslaganidek, 1985 yilda Ronald Reyganning inauguratsiyasi paytida sovuq ob-havo tufayli marosim Kapitoliy rotondasiga ko‘chirilgan edi.

AFP eslatganidek, AQShning to‘qqizinchi prezidenti Uilyam Genri Xarrison 1841 yilda inauguratsiya marosimida yomon ob-havoga e’tibor bermay, shlyapa va paltosiz shamolda turib uzoq nutq so‘zlagan. Bir oy o‘tgach, 68 yoshli siyosatchi pnevmoniyadan vafot etgan.