Yevropa Ittifoqi Rossiyaning yana 15 ta bankini SWIFT'dan uzmoqchi

Yevropa Ittifoqi Ukrainaga qarshi urushi sababli Rossiyaga qarshi sanksiyalarning yangi paketi doirasida yana 15 ga yaqin rus bankini SWIFT xalqaro bank tizimidan uzishni taklif qildi, deb xabar berdi Bloomberg 28 yanvar, seshanba kuni manbalarga tayanib. Agentlik suhbatdoshlari Rossiyaning qaysi banklarini uzish rejalashtirilganiga aniqlik kiritmadi.

Bundan tashqari, yangi, 16-sanksiya paketi Rossiya alyuminiysining importini bosqichma-bosqich taqiqlash va Rossiya neftini sotishda ishtirok etayotgan «soyadagi flot»ning 70 dan ortiq kemalariga nisbatan cheklovlarni o‘z ichiga olishi kutilmoqda. 

Bloomberg manbalari ta’kidlaganidek, yangi sanksiyalar paketini tasdiqlash uchun Yevropa Ittifoqiga a’zo barcha davlatlarning roziligi talab qilinadi va Vengriyaning qarshiligini hisobga olib, bu choralar ma’qullanishi aniq emas. Rossiyaning Ukrainaga bostirib kirishining 3 yilligi arafasida Rossiyaga nisbatan jazolarning yangi kuchaytirilishi muhokama qilinmoqda.

Bryussel Rossiyaga qarshi sanksiyalarni uzaytirishga tayyorlanmoqda

Yevroittifoqning Rossiyaga nisbatan joriy sanksiyalari har olti oyda bo‘lgani kabi yana uzaytiriladi — bu Bryusselda Yevropa Ittifoqi tashqi ishlar vazirlarining 27 yanvar, dushanba kuni bo‘lib o‘tadigan uchrashuvi oldidan rasmiylar va diplomatlar tomonidan aytilgan taxmin. «Biz Rossiyaga qarshi sanksiyalar rejimini uzaytirish ustida ishlayapmiz va bu sanksiyalar yaqin kunlarda qabul qilinishidan boshqa variantni ko‘rmayapmiz», — dedi YeIning yuqori martabali rasmiysi 24 yanvar kuni Bryusselda bo‘lib o‘tgan brifingda.

Uning eslatishicha, Rossiyaning Ukrainadagi tajovuzi munosabati bilan Yevropa Ittifoqi uch yo‘nalishda harakat qilmoqda: Ukrainani qo‘llab-quvvatlash, Vladimir Putin siyosatiga qarshi turish va Rossiyaning Ukrainaga qarshi urushi global oqibatlarini bartaraf etish. «Sanksiyalar strategiyamizning asosiy qismidir», dedi u. Rasmiyning so‘zlariga ko‘ra, bu cheklov choralari Putin rejimiga Ukrainaga qarshi urush olib borish uchun ko‘proq aktivlardan foydalanishiga to‘sqinlik qilib, unga zarar yetkazadi. «Rossiya tajovuzkorligini davom ettirar ekan, unga qarshi sanksiyalar qo‘llaniladi», — dedi u va bu masala Rossiya gazining Ukraina orqali o‘tishi bilan hech qanday aloqasi yo‘qligini aytdi.

27 yanvar kuni Yevropa Ittifoqining bir mamlakatidan kelgan vazir bu masalani Tashqi ishlar kengashida ko‘tarishi mumkin, deydi rasmiy Vengriyaga ishora qilib, biroq Yevropa komissiyasi birmuncha vaqt oldin Rossiya gazining Ukraina orqali tranzitini to‘xtatib qo‘ymaydi degan xulosaga kelgan. Bu butun Yevropa Ittifoqi yoki uning alohida a’zolarining energiya xavfsizligiga tahdid soladi.