Ukraina dronlari Tuapsedagi dengiz portiga hujum qildi

Ukraina uchuvchisiz uchoqlari 26 fevral, chorshanbaga o‘tar kechasi Krasnodar o‘lkasiga hujum qildi. Guvohlarning so‘zlariga ko‘ra, nishon Qora dengiz sohilidagi Tuapse porti bo‘lgan.

Rossiya hukumati Ukraina qurolli kuchlarining uchuvchisiz uchoqlari tinch aholi nishonlariga hujum qilgani haqida e’lon qildi. Gubernator Veniamin Kondratev Telegramʼda Tuapse va Temryuk rayonida xususiy uylar shikastlangani, biroq qurbonlar yo‘qligini ma’lum qildi.

Shahar aholisi ijtimoiy tarmoqlarda Tuapse dengiz portiga qilingan hujum haqida yozmoqda, portlashlar aks etgan videolarni joylashtirmoqda. Videolardan birida buzilgan turar joy binosi aks etgan.

Anapa uzra portlashlar

Rossiya Telegram-kanallari Anapa osmonida ham havo hujumidan mudofaa kuchlari ishlayotgani taxmin qilinayotgan portlashlar haqida xabar bermoqda. Sochi aeroportida «Kover» rejasi joriy etildi, reyslarni qabul qilish va jo‘natish vaqtinchalik to‘xtatildi.

Qrimning Rossiya tomonidan tayinlangan «hokimiyati» ham UUA hujumi haqida xabardor qilgan. Qora dengiz uzra to‘rtta dron urib tushirildi.

Ayni vaqtda Rossiya Mudofaa vazirligi Rossiya, Qrim hamda Qora va Azov dengizlari akvatoriyasi ustida 128 ta uchuvchisiz uchish apparati yo‘q qilingani haqida xabar berdi. «Krasnodar o‘lkasi hududida 83 ta UUA, Qrim Respublikasi hududida 30 ta UUA, Azov dengizi suvlarida sakkizta, Qora dengiz suvlarida beshta, Bryansk va Kursk oblastlari hududlarida bittadan UUA urib tushirildi», — deyiladi idora xabarida.