Xonanda Shahriyor giyohvand modda bilan qo‘lga olingani rad etildi

Toshkent shahar IIBB Yo‘l harakati xavfsizligi boshqarmasi Bektemir tumanida joylashgan «Sharq» YPX maskanida fuqaroning yonidan giyohvandlik moddasi topilganligi hamda qonuniy chora ko‘rish uchun Bektemir tumani IIO FMBga topshirilganligi haqida ma’lum qilgan edi.

«Sharq YPX maskaniga xizmatga jalb etilgan YPX xodimlari tomonidan Onix rusumli transport vositasi to‘xtatilib haydovchi bilan suhbat jarayonida avtomashinada yo‘lovchi sifatida kelayotgan shaxs o‘zining harakatlari bilan xodimlarda shubha uyg‘otdi. Xolislar ishtirokida ushbu shaxs tekshirilganda kiyimlari orasiga yashirib olgan giyohvandlik moddasi aniqlandi va tegishli tartibda Bektemir tumani IIO FMBga olib borib topshirildi» — deyiladi xabarda.

IIV matbuot kotibi Shohrux G‘iyosovning ma’lum qilishicha, OAVlarda gumonlanuvchi shaxs aynan «xonanda Shahriyor» ekanligi haqidagi axborotlar haqiqatdan yiroq.

«Bu kabi xabar tarqatish O‘zbekiston Respublikasi JPKning 23-moddasida belgilangan Aybsizlik prezumpsiyasi talablarini, shuningdek O‘zbekiston Respublikasining Shaxsga doir ma’lumotlar to‘g‘risidagi qonunining 14-moddasi hamda Ommaviy axborot vositalari to‘g‘risidagi qonunning 6-moddasini qo‘pol ravishda buzish hisoblanadi. Ommaviy axborot vositalari va jamoatchilikdan surishtiruv va tergovga oid axborotni tarqatishlarida qonunchilik talablariga qat’iy rioya qilishlarini so‘rab qolamiz”.