«Issiqlik ta’minoti» aksiyadorlik jamiyatiga rais tayinlandi

Hukumat qarori bilan Ilhom To‘rayev «Issiqlik ta’minoti» aksiyadorlik jamiyati boshqaruv raisi etib tayinlandi. Bu haqda Qurilish va uy-joy kommunal xo‘jaligi vazirligi matbuot xizmati xabar berdi.

Tayinlovga qadar Ilhom To‘rayev Issiqlik ta’minoti tizimini rivojlantirish va ekspluatatsiya faoliyatini muvofiqlashtirish boshqarmasi boshlig‘i lavozimida faoliyat yuritgan.

«Issiqlik ta’minoti» AJ Shavkat Mirziyoyevning 11 mart kuni imzolagan qarori bilan vazirlik huzurida tashkil etilgan bo‘lib, unga quyidagi vazifalarni yuklash belgilangan:

• tarkibidagi tashkilotlarning tarif siyosatini yuritish;
• operatsion samaradorlikni oshirish, raqamlashtirish, kadrlar malakasini oshirish;
• davlat-xususiy sheriklik loyihalarini muvofiqlashtirish hamda ularning bajarilishini nazorat qilish;
• loyihalar doirasida belgilangan samaradorlikning eng muhim ko‘rsatkichlari (KPI) ijrosini monitoring qilish;
• «Issiqlik ta’minoti» AJ huzurida mas’uliyati cheklangan jamiyat shaklidagi buyurtmachi xizmatini tashkil etish;
• injiniring kompaniyasining nizomini ishlab chiqish hamda tasdiqlash.