- Makka alyansi nega Saudiyani husiychilar hujumidan himoya qilmayapti?
Shavkat Ikromov: Hozir Saudiya Arabistoniga biror davlat tomonidan bevosita tahdid yoʻq. Husiylarga qarshi turish va mamlakat hududini himoya qilish uchun Saudiya Arabistonining oʻzida yetarli imkoniyat mavjud. Saudiya hozir asosan yana faol urushga kirib ketishdan oʻzini tiyib turibdi. Chunki husiylar bilan keng koʻlamli urushga kirish Saudiya uchun manfaatli emas. Saudiya hozir foydalanib turgan Qizil dengiz, Bab al-Mandab va Yanbu yoʻnalishlaridagi imkoniyatlardan mahrum boʻlishni istamaydi.
Qolaversa, hozir husiylarning Saudiya Arabistoniga hujumi sharoitida, Ar-Riyodning oʻzi ham Turkiya yoki Pokiston qoʻshinlarining bu yerga kelishini mutlaqo istamaydi va buni inkor qilmoqda. Biroq Pokistondagi yuqori lavozimli harbiylardan olingan maʼlumotlarga koʻra, Pokiston Eronni husiylar bilan hamkorlik qilmaslikka va ularni tiyib turishga chaqirgan.
Shuningdek, husiylar bilan muzokara olib borib, Saudiya Arabistoni hududlariga raketa zarbalari yoʻllamaslikka koʻndirish kerakligi, aks holda Saudiya Arabistoni bilan yuzma-yuz kelish xavfi mavjudligi haqida ogohlantirilgan.
Umuman olganda, alyansni hozir mutlaqo harakatsiz deb boʻlmaydi. Ular muayyan choralar koʻrmoqda. Aniq munosabat bildirildi va jarayonlardagi masʼuliyatni Eron zimmasiga yuklashga urinish kuzatilmoqda.
Agar bu hududda keng koʻlamli urush boshlansa va yangi front ochilsa, bu Eron manfaatlariga toʻliq mos kelishi mumkin. Hozir Hoʻrmuzda allaqachon front bor, urush davom etmoqda. Agar Qizil dengizda ham alohida front paydo boʻlsa, Qoʻshma Shtatlarning xavfsizlik soyaboniga tayanayotgan Koʻrfaz arab davlatlari yanada jiddiy bosim va blokada xavfi ostida qoladi.
Bunday vaziyat jahon energetika bozori va global savdoning katta qismiga ham taʼsir qilishi mumkin. Shuningdek, Yaman hududidagi vaziyatning oʻzgarishi Hoʻrmuzdagi jarayonlarga ham taʼsir koʻrsatishi ehtimoldan xoli emas.
Shu nuqtayi nazardan, strategik jihatdan husiylar, Yaman va Eron manfaatlari bu yerda uygʻunlashayotganini aytish mumkin. Ularning oʻzaro aloqalari haqida aniq xulosa qilish uchun yetarli maʼlumot yoʻq. Lekin tashqaridan qaraganda, manfaatlar uygʻunligi mavjud.
