Tramp tug‘ilgan kunida harbiy parad o‘tkazishni rejalashtirmoqda

AQSh prezidenti Donald Tramp 14 iyun kuni nishonlanadigan Qo‘shma Shtatlar armiyasining 250 yilligiga bag‘ishlab mamlakat poytaxti Vashingtonda yirik harbiy parad o‘tkazishni rejalashtirmoqda. Bu haqda 7 aprel, dushanba kuni Oq uy rahbari shu kuni 79 yoshga to‘lishi haqida ma’lum qilgan bir qator Amerika nashrlari xabar tarqatdi.

Parad rejalari haqida ilk bor xabar bergan Washington City Paper nashriga ko‘ra, uning yo‘nalishi 4 milya (deyarli 6,5 km)ni — AQSh Mudofaa vazirligining Vashington chekkasidagi Arlington shtab-kvartirasidan Oq uygacha bo‘lgan masofani tashkil etadi.

Mahalliy hukumat va harbiy amaldorlar The Hill va NewsNation nashrlariga rejalarni tasdiqladi, biroq ular hali tasdiqlanmaganini va rasmiy so‘rov yoki buyruq yo‘qligini aytdi. Washington City Paper'ning ta’kidlashicha, mahalliy rasmiylar faqat parad rejalari haqida xabardor qilingan.

Tramp prezident sifatidagi birinchi muddatidayoq 2018 yilda harbiy parad o‘tkazmoqchi edi, biroq tadbirning yuqori narxi – 92 million dollar atrofida (taxminan 84 million yevro) bo‘lgani uchun bu amalga oshmadi. Bundan tashqari, shahar rasmiylari tanklar va boshqa og‘ir zirhli texnikalar ular yurgan yo‘llarga jiddiy zarar yetkazishidan qo‘rqishgan.

Keyingi, 2019 yilda Vashington 27 yil ichida birinchi yirik harbiy paradni 4 iyul, AQSh Mustaqillik kunida o‘tkazdi.