Lukashenko 8 ming mahkumga amnistiya qo‘llash to‘g‘risidagi qonunni imzoladi

Aleksandr Lukashenko Ikkinchi jahon urushidagi g‘alabaning 80 yilligi munosabati bilan amnistiya to‘g‘risidagi qonunni imzoladi. Belarus prezidenti matbuot xizmatining ma’lum qilishicha, qonun qariyb 8 ming mahkumga ta’sir ko‘rsatadi.

«Buyuk G‘alaba bayrami arafasida ushbu qonunning qabul qilinishi – aybdor shaxslarni ijtimoiy hayotga qaytarishga intilayotgan Belarus jamiyatida insonparvarlik namoyon bo‘layotganidan dalolatdir», — deyiladi xabarda.

Amnistiya ta’sir qiladigan mahkumlar jazodan va boshqa jinoiy javobgarlik choralaridan ozod etiladi. Katta ijtimoiy xavf tug‘dirmaydigan yoki unchalik og‘ir bo‘lmagan jinoyatlar uchun jazo yengillashtirilishi mumkin.

Amnistiya yetkazilgan zarar yoki talafotni to‘liq qoplagan va jazo muddati davomida ijobiy tavsiyanoma olgan shaxslarga nisbatan qo‘llanadi.

Qonun quyidagi yangiliklarni ham nazarda tutadi:

• ilgari sudlanmagan, 70 yoshga to‘lgan va olti yilgacha ozodlikdan mahrum etilgan shaxslarga jazo yengilroq – ochiq turdagi jazoni ijro etish muassasasiga yuborilmasdan, ozodlikni cheklash shakliga almashtiriladi;
• ehtiyotsizlik bilan inson o‘limiga sabab bo‘lgan jinoyatlarda to‘liq amnistiya emas, balki qisman amnistiya qo‘llanadi – jazo muddati bir yilga qisqartiriladi.

Shuningdek, Belarus prezidenti Aleksandr Lukashenko ekstremistik yo‘nalishdagi jinoyatlar uchun qamalgan 42 mahkumni afv etdi. Ularning 13 nafari surunkali kasallikka ega, bir nafari nogiron. Mahkumlarning 24 nafarining voyaga yetmagan farzandi bor.