Pokiston tomoniga ko‘ra, mamlakatning turli shaharlariga hujum qilgan hindlarning 25 ta droni yo‘q qilingan. Hindiston ham raqibning dronlari va raketalarini «zararsizlantirgani»ni ma’lum qildi.
«Bu Hindistonning navbatdagi harbiy tajovuzi», – dedi Pokiston armiyasi rasmiy vakili Ahmad Sharif Chaudhri.
O‘z navbatida, Hindiston tomoni ham o‘z hududiga uchib kelayotgan Pokiston dronlari va raketalarini «zararsizlantirgani»ni ma’lum qildi.
BBC harbiy qudratiga ko‘ra bu ikki davlat armiyalari nisbati qanday ekanini ko‘rib chiqdi.
Dronlar
General Atomics Aeronautical Systems
Ikkala davlat ham dronlar parkini kengaytirmoqda – ham import qilish orqali, ham o‘z texnologiyalari va ishlab chiqarishini rivojlantirish hisobiga. Hindiston dronlar soni bo‘yicha yetakchilik qilmoqda. Harbiy ekspert Rahul Bedi BBC bilan suhbatda aytishicha, bir necha yildan so‘ng Hindiston armiyasida roppa-rosa 5000 ta yirik dron bo‘ladi.
2024 yilda Hindiston AQSh Davlat departamenti bilan 31 ta dron – MQ-9B SkyGuardian rusumli jangovar dronlar hamda SeaGuardian rusumli dengiz dronlarini sotib olish bo‘yicha shartnoma imzoladi.
Pokiston Hindistonga qaraganda kamroq dronlarga ega bo‘lsa-da, uning harbiy dronlari kuzatuv, razvedka va nishonga olish kabi turli imkoniyatlarga ega.
Pokiston dronlarining asosiy afzalligi ulardan jangovar harakatlarda foydalanish bo‘yicha to‘plangan tajribadir. Xususan, Pokistonning Buraq rusumli uchuvchisiz uchog‘i 2015 yildan beri aksilterror operatsiyalarida qo‘llab kelinmoqda.
