Ilon Mask asta-sekin siyosatdan ketishga va’da berdi

Amerikalik milliarder Ilon Mask Bloombergʼga bergan intervyusida besh yildan keyin ham Tesla’ni boshqarishni davom etishini, ammo siyosatdan ketmoqchi ekanini ma’lum qildi. Maskning so‘zlaridan keyin Tesla aksiyalari 3,6 foizga ko‘tarildi.

Ilon Mask — Donald Tramp ma’muriyatida AQSh Hukumati samaradorligi departamenti (DOGE) kuratori. Uning prezident bilan yaqinligi va yangi lavozimda amalga oshirgan ishlari, jumladan, davlat xizmatchilarini ommaviy ravishda ishdan bo‘shatishlar ko‘plab tandiqlarga sabab bo‘lmoqda. AQSh va butun dunyo bo‘ylab Maskning DOGE’dagi faoliyati sabab ishlab chiqaruvchiga qarshi namoyishlar bo‘lib o‘tdi.

Investorlarni tinchlantirish maqsadida biznesmen kelajakda siyosatga «kamroq vaqt» ajratishga va’da berdi. Aprelda u Oq uydagi ish faoliyatini haftasiga bir-ikki kunga qadar qisqartirishini aytgandi. Oq uy apparati rahbari Syuzan Uaylsning so‘zlariga ko‘ra, Mask DOGE’dagi faoliyatini deyarli masofadan turib bajarmoqda.

Milliarderning so‘zlariga ko‘ra, u Tesla aksiyalariga ko‘proq boylik orttirish maqsadida egalik qilish niyatida emas. «Bu pul masalasi emas. Bu kompaniya kelajagini oqilona nazorat qilish masalasidir», — deydi u.

Bloomberg hisob-kitoblariga ko‘ra, Ilon Maskning boyligi 376 milliard dollarni tashkil etadi. U 2008 yildan beri Tesla bosh direktori lavozimida ishlab kelmoqda va kompaniyaning eng yirik aksiyadori hisoblanadi — 13 foiz ulushga ega. AQSh prezidenti saylovlaridan bir necha hafta o‘tib, investorlar elektromobil ishlab chiqaruvchining aksiyalariga 700 milliard dollardan ortiq sarmoya kiritgan edi. Dekabr oyida Tesla aksiyalari tarixiy maksimumga qadar ko‘tarildi — 488,54 dollar. Natijada, Mask boyligi 400 milliard dollardan oshdan tarixdagi birinchi insonga aylandi. Ammo shundan buyon kompaniya aksiyalari qiymati 50 foizdan ortiqqa tushib ketdi.

The Wall Street Journal 1 may kuni Tesla direktorlar kengashi Maskning o‘rniga yangi bosh direktor qidirayotgani haqida yozgandi. Nashr suhbatdoshlarining so‘zlariga ko‘ra, direktorlar kengashi a’zolari allaqachon bir nechta kompaniyaga bu borada murojaat qilgan. Taxminan shu vaqtda Tesla rahbariyati Mask bilan ham uchrashgan. Undan kompaniyadagi ishiga ko‘proq e’tibor qaratishni so‘rashgan. WSJʼning qayd etishicha, Mask bunga e’tiroz bildirmagan.