Toshkentda savdo do‘koni tomiga chiqqan 11 yoshli qiz tok urishi oqibatida vafot etdi

U tomga ukasining o‘yinchog‘ini olib tushish maqsadida narvon orqali chiqqan. Qaytib tushayotgan vaqtida tom qismiga yaqin joydan o‘tgan elektr tarmog‘ini ushlab olgan va tok urishi oqibatida voqea joyida vafot etgan. Holat yuzasidan jinoyat ishi qo‘zg‘atildi.

Foto: Toshkent shahar IIBB matbuot xizmati

Ijtimoiy tarmoqlarda 11 yoshli qizning tok urishi oqibatida vafot etgani haqidagi xabarlar tarqaldi. Toshkent shahar IIBB matbuot xizmati holat yuzasidan rasmiy ma’lumot berdi.

Boshqarma ma’lumotida keltirilishicha, hodisa joriy yilning 30 may kuni taxminan soat 18.00 da sodir bo‘lgan. 2014 yilda tug‘ilgan N.A. Mirobod tumani Amir Temur ko‘chasidagi savdo do‘konlardan birining tom qismiga ukasining o‘yinchog‘ini olib tushish uchun narvon yordamida chiqqan.

Qiz o‘yinchoqni olib, qaytib tushayotgan vaqtida tom qismiga yaqin joydan o‘tuvchi elektr tarmog‘ini ushlab olgan. Buning oqibatida u tok urib, voqea joyida vafot etgan.

Holat yuzasidan Mirobod tuman IIO FMB huzuridagi Tergov bo‘limi tomonidan Jinoyat kodeksining 257-moddasi 2-qismi “a” bandi (Mehnatni muhofaza qilish qoidalarini buzish odam o‘lishiga sabab bo‘lishi) bilan jinoyat ishi qo‘zg‘atilgan. Hozirda tergov harakatlari davom etmoqda.

Avvalroq Buxorodagi xususiy bog‘chada ikki yashar bola tok urishidan vafot etgandi.