Eron TIV rahbari: Vashington bilan yadroviy muzokaralarni boshlash haqida hech qanday qaror qabul qilinmagan

Eron tashqi ishlar vaziri Abbos Arag‘chining aytishicha, AQSh ma’muriyati bayonotlariga zid ravishda Vashington bilan yadroviy muzokaralarni boshlash haqida hech qanday qaror qabul qilinmagan.

«Yadro quroliga ega barqudrat davlat va yadro quroliga ega rejim yevropaliklar yordamida Eron xalqini parchalab tashlash va Amerika gegemonligiga qarshi 50 yillik kurashga chek qo‘yishni rejalashtirdi, ammo ular muvaffaqiyatsizlikka uchradi», dedi u davlat televideniyesi dasturida.

Hujumlar oldidan AQSh bilan yadroviy muzokaralarga ishora qilgan Eron tashqi ishlar vaziri: «Oxirgi muzokaralarda ular bizni Eron millatining huquqlaridan voz kechishga ishontirishga harakat qildi. Biz rad etganimizdan so‘ng ular urush keltirib chiqardi va jinoyatchi sionist rejimga (Isroil) hujumlar uyushtirishga ruxsat berdi» dedi.

Arag‘chi o‘z fikrini quyidagi so‘zlar bilan davom ettirdi:

«Amerikaliklar muzokaralar davomida diplomatiyaga xiyonat qildi va bu tajriba ular bilan bo‘lajak muzokaralar haqidagi qarorga ta’sir qiladi, ammo diplomatiya davom etmoqda va men ba’zi mamlakatlar tashqi ishlar vazirlari bilan aloqadaman».

AQSh prezidenti Donald Trampning «eronliklar bilan kelasi hafta uchrashamiz» degan bayonoti haqidagi savolga javoban Arag‘chi: «Bu bayonotlarni jiddiy qabul qilmaslik kerak. AQSh bilan muzokaralar borasida hali kelishuvga erishilgani yo‘q. Bu mavzuda hatto suhbat ham bo‘lmagan. Ular tinmay qarama-qarshi bayonotlar bermoqda», dedi.

Eron parlamenti tomonidan qabul qilingan va Atom energiyasi xalqaro agentligi (AEXA) bilan hamkorlikni to‘xtatuvchi, Konstitutsiya muhofizlari kengashi tomonidan ma’qullangan qonun haqidagi savolga Arag‘chi shunday javob berdi: «Yangi qonun biz uchun majburiydir. (AEXA direktori Rafael Mariano) Grossining hisoboti Isroil tajovuzi uchun yo‘l ochdi. Hisobot aniq va adolat emas edi. Bundan tashqari, bizning yadroviy obektlarimizga hujum sodir bo‘ldi, AEXA esa uni hatto qoralay olmadi».

Eron va Isroil o‘zaro hujumlaridan 12 kun o‘tib erishilgan o‘t ochishni to‘xtatish jarayoni haqida vazir shunday ta’kidladi:

«Eron va sionistik rejim (Isroil) muzokaralar olib borayotgani yoki har ikki tomon AQSh bilan muzokaralar olib borayotgani yoxud AQSh vositachilik qilayotgani haqida mish-mishlar tarqaldi. Bularning hech biri to‘g‘ri emas. Sionistik rejim shu darajaga yetdiki, chorasizlikdan hujumlarini to‘xtatdi, hujumlar to‘xtaganida esa biz ham ularni davom ettirmadik».