Atirau-Toshkent yo‘nalishi bo‘yicha aviareyslar yo‘lga qo‘yiladi

Qozog‘istonning Atirau shahrida O‘zbekistonning sayyohlik salohiyatiga bag‘ishlangan taqdimot o‘tkazildi.

Foto: Dunyo

Oqtov shahridagi Bosh konsulxona tashabbusi bilan O‘zbekiston elchixonasi ko‘magida tashkil etilgan tadbirda yirik turistik korxonalar, FlyArystan aviakompaniyasi va mahalliy tadbirkorlar qatnashdi. Shuningdek, O‘zbekiston kasaba uyushmalari federatsiyasi sanator-kurortlar bosh boshqarmasi rahbariyati, sanatoriylar vakillari, O‘zbekiston tibbiyot turizm uyushmasi, turistik korxonalar, "Dipservis xizmati" va Qozog‘iston "Xalq banki" va uning Toshkentdagi "Tenge banki" rahbariyati onlayn tarzda ishtirok etdi.

Tadbir ishtirokchilari O‘zbekiston turistik salohiyati, madaniy-tarixiy merosi, yangi tur yo‘nalishlar va xizmatlar bilan tanishdi.

Anjuman davomida ikki mamlakat sayyohlik kompaniyalari duch kelayotgan muammolar va ularni bartaraf etish yo‘llari muhokama qilindi.

Qozog‘iston fuqarolarini O‘zbekistonning tibbiyot turizmi imkoniyatlaridan keng foydalanishga jalb qilish masalalariga alohida e’tibor qaratildi.

FlyArystan aviakompaniya vakillari o‘z chiqishida joriy yilning 15 iyul sanasidan boshlab Atirau-Toshkent yo‘nalishi bo‘yicha haftasiga uch marta aviareyslar yo‘lga qo‘yilishini ma’lum qildi. Bu Qozog‘istondan O‘zbekistonga turistlar va ishbilarmon doiralar vakillarining oqimini oshirishga xizmat qiladi.