Qoʻshimcha funksionallar
-
Tungi ko‘rinish
Sabzavot va moyli ekinlarni ishlab chiqarish hamda eksport qilish ko‘payadi
Vazirlar Mahkamasining "Respublikada piyoz va sabzi mahsulotlarini yetishtirishni ko‘paytirish, chuqur qayta ishlash va ularning eksport hajmlarini oshirish chora-tadbirlari to‘g‘risida"gi hamda "Respublikada moyli ekinlar yetishtirishni rivojlantirishga oid qo‘shimcha chora-tadbirlar to‘g‘risida"gi qarorlari qabul qilindi.
Hujjatlar bilan quyidagilar tasdiqlandi:
- 2025-2027 yillarda Qoraqalpog‘iston Respublikasi va viloyatlarning barcha toifadagi xo‘jaliklarida piyoz va sabzi mahsulotlarini yetishtirishni ko‘paytirishning maqsadli ko‘rsatkichlari;
- meva-sabzavot mahsulotlari yetishtiruvchi sub’yektlar tomonidan mahsulotlarni saqlash uchun sovitkichli omborxona, saralash, quritish, qadoqlash va qayta ishlash infratuzilmalarini tashkil etish bo‘yicha maqsadli ko‘rsatkichlar;
- respublika hududida moyli ekinlar yetishtirishga ixtisoslashgan tumanlarni tashkil etish.
Meva-sabzavotchilikka ixtisoslashgan tumanlarda Zomin tajribasiga asoslanib, kamida 100 gektar maydonga yuqori hosilli piyoz va sabzi navlarini ekish, resurslarni tejaydigan texnologiyalarni qo‘llash, shu jumladan yomg‘irlatib va tomchilatib sug‘orish, hamda agrotexnik tadbirlarni o‘z vaqtida va sifatli o‘tkazish orqali yuqori hosil olish ta’minlanadi.
Hududlarning tuproq-iqlim sharoitlariga qarab, almashlab ekish tizimida qishloq xo‘jaligi uchun mo‘ljallangan sug‘oriladigan maydonlarning 5 foizigacha moyli ekinlar ekishga ruxsat etiladi, bunda bir dalada moyli ekinlarni 2 yildan ortiq ekish taqiqlanadi.
Yog‘-moy korxonalari va tovar ishlab chiqaruvchilar o‘rtasida moyli ekinlarni xarid qilish bo‘yicha shartnomalar Qishloq xo‘jaligi vazirligining "Agroplatforma" axborot tizimi orqali tuziladi.
