Kamchatkada 500 yil ichida birinchi marta Krasheninnikov vulqoni otilishni boshladi

Rossiyaning Kamchatka yarimoroli qirg‘oqlarida yakshanbaga o‘tar kechasi navbatdagi kuchli zilzila sodir bo‘ldi. AQSh Geologiya xizmati ma’lumotlariga ko‘ra, zilzila magnitudasi 6,8 ballni, o‘choq chuqurligi 35 kilometrni tashkil etgan. Rossiya Favqulodda vaziyatlar vazirligi sunami to‘lqinlari Kamchatkaning uchta hududiga yetib kelishi mumkinligini ma’lum qildi.

Avvalroq vazirlik o‘z telegram-kanalida kutilayotgan to‘lqin balandligi kichik bo‘lishini ma’lum qilgan, biroq odamlarni qirg‘oqdan uzoqlashish kerakligi haqida ogohlantirgandi.

Rossiyalik olimlar ta’kidlashicha, yarimoroldagi Krasheninnikov vulqoni 500 yildan ortiq vaqt ichida birinchi marta uyg‘ongan – bu o‘tgan hafta Kamchatka qirg‘oqlari yaqinida ro‘y bergan kuchli zilziladan keyingi seysmik faollik natijasi bo‘lishi mumkin.

«Bu Krasheninnikov vulqonining 600 yil ichida tarixan tasdiqlangan birinchi otilishi», – deya Kamchatka vulqon otilishi oqibatlariga qarshi kurash guruhi rahbari Olga Girinaning so‘zlaridan iqtibos keltiradi RIA Novosti agentligi.

Girina Vulkanologiya va seysmologiya instituti telegram-kanalida Krasheninnikovning so‘nggi otilishi 1463 yilda sodir bo‘lgani va shundan beri hech qanday otilish bo‘lmaganini ma’lum qilgan.

Rossiya Favqulodda vaziyatlar vazirligining Kamchatka bo‘limi ma’lum qilishicha, otilish vaqtida kul ustuni 5–6 kilometr balandlikka ko‘tarilgan. Vulqonning o‘zi 1856 metr balandlikka ega.

«Kul buluti sharqqa, Tinch okeani tomon suzib bormoqda. Uning yo‘lida aholi punktlari yo‘q», – deyiladi vazirlik xabarida.

Ikkala hodisa ham Kamchatka qirg‘oqlarida yaqinda sodir bo‘lgan 8,8 magnitudali kuchli zilzila bilan bog‘liq bo‘lishi mumkin, olimlarning hisob-kitoblariga ko‘ra, u 1952 yildan beri mintaqadagi eng kuchlisi bo‘lgan va Fransiya Polineziyasi va Chili kabi chekka hududlarda sunamiga kuzatilishiga sabab bo‘lgan.

Rossiyalik ekspertlar zilziladan keyin bir necha hafta ichida kuchli aftershoklar bo‘lishi mumkinligi haqida ogohlantirgandi.

«Kuchli aftershok jarayoni rivojlanmoqda, bu Petropavlovsk-Kamchatskiyda juda yaxshi sezilmoqda. Kuchli, sezilarli aftershoklar yana kamida bir oy davom etadi», – deya ogohlantirdi o‘tgan hafta geofizika xizmati. Qayd etilishicha «voqealarning bunday ko‘lamida» 7,5 magnitudali kuchli aftershoklar ham bo‘lishi mumkin.

Krasheninnikov vulqoni Kamchatkaning Sharqiy vulqon kamari tarkibiga kiradi va region ma’muriy markazi Petropavlovsk-Kamchatskiydan taxminan 200 kilometr uzoqlikda joylashgan. Mutaxassislar otilish faoliyatining qancha vaqt davom etishini aytib berish qiyinligini, ammo vaziyat doimiy nazoratda ekanini bildirishgan.