Samarqand shahar tibbiyot birlashmasi markaziy shifoxonasida 80 yoshli otaxonning 3 kilogrammga yetgan buqog‘i operatsiya orqali olib tashlandi. Bu haqda Kun.uz’ga birlashma boshlig‘i Ahmadjon Bobojonov ma’lum qildi.
“Biz bemorda “gigant tugunli notoksik buqoq” deb ataladigan juda kam uchraydigan patologiyani aniqladik. Asosiy sabab – uzoq yillik yod yetishmovchiligi. Bu holatlarda qalqonsimon bez hayotiy funksiyalarni qiyinlashtirib qo‘yadi va bemor faqat operatsiya yordamida sog‘ayishi mumkin.
Bunday murakkab jarayonda har bir millimetr muhim. Biz nafaqat tugunlarni olib tashlashimiz, balki bemorning hiqildoq nervlari va qon-tomirlarini asrab qolishimiz kerak edi. Operatsiya muvaffaqiyatli o‘tdi. Bemor qisqa vaqt ichida o‘ziga kelib, nafas olishi va yutinishi yengillashdi”, — deydi tibbiyot fanlari doktori, professor Ahmadjon Bobojonov.
Hozirda bemor to‘liq sog‘aygan va shifokorlar tavsiyasiga muvofiq yengil muolajalarni davom ettirmoqda.
