O‘zbekistonda foydalanishda bo‘lgan avtomobilni foydalanishda bo‘lgan boshqa avtomobilga almashtirish – “Trade-up” dasturi yo‘lga qo‘yiladi. 22 avgust kuni bu borada hukumat qarori qabul qilindi.
Bunga qadar, foydalanishda bo‘lgan avtomobilni ustiga pul to‘lab, yangisiga almashtirish – “Trade-in” dasturi joriy etilgandi.
Har ikki holatda ham jismoniy yoki yuridik shaxs distribyutor yoki diler tashkilotiga minilgan avtomobilni sotayotganda, oldi-sotdi bitimini notarial rasmiylashtirish talab etilmaydi. Shu bilan birga, er (xotin)ning notarial tartibda tasdiqlangan rozilik xati kerak bo‘ladi.
Qonunchilikda bu tushunchalarga quyidagicha izoh berildi:
- “Trade-in” – ilgari foydalanishda bo‘lgan avtomototransport vositasini yangi avtomototransport vositasiga narxlaridagi farqni to‘lagan (narxlaridagi farqni olgan) holda almashtirish;
- “Trade-up” – ilgari foydalanishda bo‘lgan avtomototransport vositasini ilgari foydalanishda bo‘lgan avtomototransport vositasiga narxlaridagi farqni to‘lagan (narxlaridagi farqni olgan) holda almashtirish.
Shuningdek, qonunchilikda distribyutorlar va dilerlar tushunchasi ajratildi:
- distribyutor tashkiloti – O‘zbekiston Respublikasi hududida yangi avtomototransport vositalarini realizatsiya qilish bo‘yicha ishlab chiqaruvchi bilan tegishli distribyutorlik kelishuviga ega yuridik shaxs;
- diler tashkiloti – O‘zbekiston Respublikasi hududida yangi avtomototransport vositalarini realizatsiya qilish bo‘yicha distribyutor tashkiloti yoki ishlab chiqaruvchi bilan tegishli dilerlik kelishuviga ega yuridik shaxs.
Avvalroq yengil avtomobillarni sotuvchi rasmiy dilerlar ro‘yxati e’lon qilingandi.
