«Futbolchilar ham so‘rashyapti» – Kapadze ishidagi mavhumlik haqida

O‘zbekiston milliy jamoasi bosh murabbiyi Temur Kapadze o‘z o‘rniga xorijlik murabbiy kelishi haqidagi gaplar yuzasidan yana bir bor munosabat bildirdi.

«Bu [mavzu] odamni sovitadi. Xonada o‘tirasiz, ishlash kerak, mashg‘ulot bor, yigitlarga gapiradigan gaplarim bor… yoqimsiz [hissiyot]. Motivatsiyani menga xalq berdi, ayrim jurnalistlar berdi.

Albatta, bu [gap-so‘zlar] ta’sirini ko‘rsatdi. Futbolchilar ham internetda ko‘ryapti, ular ham „Aka, nima bo‘lyapti?“ deb savol beraverdi. Yoqimsiz holat. Turnirdan avval tayyorlashim kerak, bu yerda esa bunday narsalar bo‘lyapti

Hammasini rasmiy izoh orqali tartibga solsa bo‘lardi. Agar xorijlik murabbiy jalb qilishmoqchi ekan, kichik matbuot anjumani tashkillashtirib „Jahon chempionati tajribasiga ega murabbiy qidiryapmiz. Temurga qilgan ishlari uchun rahmat“ deb aytib qo‘yishsa bo‘lardi.

Hamma menga savollar beraverdi. Shu tomondan O‘zbekiston futbol assotsiatsiyasi meni qiynab qo‘ydi. Ehtimol, o‘zlari ham hali yakuniy qarorga kelishmagandir.

Agar top darajadagi xorijlik murabbiy kelsa, qarshiligim yo‘q. Uning yonida yurib, ko‘r narsa o‘rganishim mumkin», –degan Kapadze Oriat Dono radiosidagi «Futbol+» ko‘rsatuvida.

U o‘zbek murabbiylari ham Jahon chempionatida tajriba ortirishi kerakligini gapirdi.

«Har bir musobaqa, jumladan, CAFA ham bizga yaxshi tajriba bo‘ldi. Qayerdadir xato qilasiz, keyin tahlil qilasiz, tajriba shunday keladi-da. Jahon chempionatida bo‘lmasa, tajribani qayerda yig‘amiz. Maqsad chempion bo‘lish bo‘lmasa, mayli, guruhdan chiqish bo‘lsin, lekin o‘sha tajriba ham foydali bo‘ladi-ku. Men, balki boshqa o‘zbek murabbiyi bo‘lishi mumkin, tajriba shu yerda [Jahon chempionatida] yig‘iladi-ku. Yig‘ilgan tajriba shu yerda – o‘zbek futbolida qo‘llanadiku», – dedi Kapadze.

Kapadze o‘rniga nomzodlar

So‘nggi vaqtlarda O‘zbekiston milliy jamoasi boshqaruviga xorijlik murabbiy olib kelinishi haqida xabarlar chiqmoqda. Avvaliga O‘zbekiston futbol assotsiatsiyasi 2014 yil Germaniyani jahon chempioniga aylantirgan Yoaxim Lyov bilan muzokaralar olib borgan, yakunda tajribali mutaxassis bu taklifni rad etgandi. Turkiyalik Fotih Terim haqida ham xabarlar chiqdi, ammo bu variant muzokaralar darajasiga yetib bormadi.

Keyinroq O‘FA portugaliyalik mutaxassis Paulu Bentuni milliy jamoa bosh murabbiyligiga asosiy nomzodlardan biri sifatida ko‘rib chiqayotgani haqida xabar tarqaldi. Ammo ushbu mutaxassis bilan muzokaralar kelishuv bilan yakunlanmadi, ya’ni u ham taklifni rad etgan.

Endi esa OAVda xorvatiyalik mutaxassis Slaven Bilich O‘zbekiston milliy jamoasi bilan bog‘lanmoqda.

Eslatib o‘tamiz, Timur Kapadze joriy yil 22 yanvarida Srechko Katanets o‘rniga milliy jamoa bosh murabbiyi etib tayinlangandi. Kapadze boshqaruvida jamoa 2026 yil AQSh, Kanada va Meksika mezbonligida o‘tadigan jahon chempionati saralashining 3-bosqichi doirasida o‘z uyida Qirg‘izistonni mag‘lub etdi (1:0) va mehmonda Eron bilan durang o‘ynadi (2:2). Shuningdek, safarda aynan Bentu boshchiligidagi BAA bilan o‘yinda durang hisobni saqlab qolib (0:0), o‘z tarixida ilk marta jahon chempionatiga chiqdi.

Uning boshqaruvida O‘zbekiston milliy jamoasi sentabr oyida CAFA Nations Cup turnirida g‘olib chiqdi.