Samarqand bog‘chalariga muzlatilgan va hidlangan go‘sht yetkazilgani aytilmoqda: mudiralar bolalar sog‘ligidan xavotirda

Shahardagi bog‘chalarga muzlatilgan va sifati buzilgan go‘sht mahsulotlari tarqatilgani ma’lum qilinmoqda. Bog‘cha mudiralari bolalarga muzlatilgan go‘sht berish mumkin emasligini aytgan. Ta’minotchi korxona (autsorsing) vakili mudiraga bosim qilib, “kerak bo‘lsa boshqa narsa ham berasiz”, degan.

{Yii::t(}

O'tkazib yuborish 6s

O'tkazib yuborish

Joriy yilning 9 sentabridan Samarqand viloyatidagi maktabgacha ta’lim tashkilotlari yangi autsorsing kompaniyasi bilan ishlay boshladi. Ammo dastlabki kundanoq ijtimoiy tarmoqlarda noroziliklar paydo bo‘ldi.

Samarqand shahridagi ko‘plab bog‘chalarga yetkazib berilgan mahsulotlar, ayniqsa go‘sht sifati haqida shikoyatlar ko‘paydi. Xabarlarga ko‘ra, bog‘chalarga muzlatilgan va hatto hidlangan go‘sht tarqatilgan.

Kun.uz ushbu holat bo‘yicha jurnalistik surishtiruv olib bordi.

Samarqand shahridagi 38-maktabgacha ta’lim tashkiloti mas’ullari 10 sentabr kuni keltirilgan go‘sht mahsulotlarini qaytarib yuborganini bildirdi. Shu kuni ular ko‘chadan boshqa go‘sht xarid qilib, bolalar taomiga solishgan. Shuningdek, sut keragidan ancha kam olib kelingan.

36-maktabgacha ta’lim tashkilotida ham xuddi shunday holat kuzatilgan. Bog‘cha hamshirasi Nilufar O‘lmasova muzlatilgan go‘shtning sifat sertifikati taqdim etilmagani uchun mahsulotdan foydalanmagan. Ta’minotchidan hujjat talab qilinganda, ular sertifikat taqdim qila olmagan.

Boshqa bog‘chada esa mahsulotni qaytarish jarayonida ta’minotchi vakili bog‘cha mudirasini rahbari bilan bog‘lab bergan. Mudira: “Bolalarga muzlatilgan go‘sht bermaymiz”, degan paytda unga: “Undan ham battarini berib yuborasiz”, degan tahdidli javob qaytarilgan.

Shahardagi yana bir bog‘chaga 45 litr o‘rniga atigi 13 litr sut yetkazilgani aniqlandi.

Umuman, Samarqand shahridagi ko‘plab maktabgacha ta’lim tashkilotlarida shunga o‘xshash muammolar kuzatilgani haqida ma’lumotlar bor. Aksariyat bog‘chalarga sut umuman yetkazilmagan yoki keragidan kam miqdorda olib kelingan.

Samarqand viloyati maktabgacha va maktab ta’limi boshqarmasi shu’ba rahbari Salohiddin Nomirovning aytishicha, “LAZZATLI HALOL OSHXONA” kompaniyasi Samarqand shahridan tashqari Toyloq, Urgut va Payariq tumanlari uchun o‘tkazilgan tenderda g‘olib bo‘lgan.

Biroq birinchi kundanoq ko‘plab e’tirozlarga sabab bo‘lgan kompaniya haqida boshqarmaning o‘zida ham to‘liq ma’lumot yo‘q. Nomirovning so‘zlariga ko‘ra, korxona hali faoliyatni endi boshlagan va “kamchiliklarni asta-sekin bartaraf qilishi mumkin”. Shu bilan birga, boshqarma hozircha kompaniyadan rasmiy izoh yoki hisobot talab qilmagan.

Tender shartlarida sifat nazorati qanday belgilangan? Nega mas’ullar birinchi kundanoq nazorat o‘rnatmadi? Kompaniya mahsulotlarni qayerdan olyapti va nima uchun sertifikat taqdim qila olmadi? Bu kabi mahsulotlar yetkazib berilishi ortida manfaatlar to‘qnashuvi yoki korrupsiya yo‘qmi? Savollar hozircha ochiq qolmoqda.

Darvoqe, Samarqand viloyati Sanitariya-epidemiologik osoyishtalik va jamoat salomatligi boshqarmasi mas’ul xodimi Iroda Aripova bilan ham bog‘landik. Mutaxassis ta’kidlashicha, bog‘chalarga muzlatilgan go‘sht yetkazib berilishi amaldagi sanitariya me’yorlariga zid.

Bolalar ovqati masalasida xatoga yo‘l qo‘yish mutlaqo mumkin emas. Har bir sifatsiz mahsulot, avvalo, sog‘liq uchun xavf hisoblanadi. Shu bois mas’ul idoralar bu holatni yuzaki emas, chuqur o‘rganib, ochiq qolgan savollarga javob berishi lozim.

Ma’lumot uchun, hukumatning shu yil yanvardagi 1-son qarori asosida davlat bog‘chalari autsorsing asosida ovqatlantirilishi tartibi belgilandi.

Etender.uzex.uz'dagi ma’lumotlarga ko‘ra, Samarqand viloyati bog‘chalarini olgan autsorser kompaniyalar hududlar kesimida quyidagicha taqsimlangan:

1. Samarqand shahar: “Lazzatli-Halol Oshxona” MChJ;

2. Payariq tumani: “Lazzatli-Halol Oshxona” MChJ;

3. Samarqand tumani: “Lazzatli-Halol Oshxona” MChJ;

4. Toyloq tumani: “Lazzatli-Halol Oshxona” MChJ;

5. Urgut tumani: “Lazzatli-Halol Oshxona” MChJ;

6. Bulung‘ur tumani: “Lazzatli-Halol Oshxona” MChJ;

7. Ishtixon tumani: “Proof-Food” MChJ;

8. Nurobod tumani: PROOF-FOOD MChJ;

9. Jomboy tumani: Jasur Fermer Xo’jaligi;

10. Kattaqo‘rg‘on tumani: “Lazzat Luks” MChJ;

12. Qo‘shrabot tumani: “Lazzat Luks” MChJ;

12. Narpay tumani: “Lazzat Luks” MChJ;

13. Oqdaryo tumani: “Lazzat Luks” MChJ;

14. Paxtachi tumani: “Lazzat Luks” MChJ;

15. Past Darg‘om tumani: “Ekspres Kelajagi Fayzli Tong” MChJ.

Ma’lumot uchun, autsorsing (inglizcha: autsourcing) — bu bir kompaniyaning o‘z faoliyatidagi ayrim ish, xizmat yoki jarayonlarni tashqi tashkilotga (yoki shaxsga) topshirishi, ya’ni ularni “tashqaridan” bajarishga buyurtma berishidir. Oddiy qilib aytganda, bunda ma’lum xizmat pul evaziga tashqi kompaniya tomonidan amalga oshiriladi.

Isomiddin Po‘latov
Faxriddin Xotamov
Kun.uz