Instagram va Telegram'da soxta onlayn kiyim do‘koni ochganlar ushlandi

Toshkent viloyatida o‘tkazilayotgan «Xavfsiz kibermakon» tezkor-profilaktika oyligi doirasida «onlayn kiyim do‘koni» niqobi ostida tashkil etilgan firibgarlik fosh etildi.

Foto: IIBB

Ma’lum bo‘lishicha, 4 nafar shaxs oson daromad orttirish maqsadida Instagram hamda Telegram tarmoqlari orqali «erkaklar kiyimlari savdosi» niqobi ostida soxta sahifalar ochib, arzon narxlarda mahsulotlar taklif qilgan. Ular xaridorlardan oldindan pul o‘tkazishni so‘rab, mablag‘larni begonalarga tegishli bank kartalariga tushirgan va shaxsiy ehtiyojlari uchun sarflab kelgan.

Joriy yil 11 iyun kuni Toshkent tumanida yashovchi fuqaro Instagram orqali ularga bog‘lanib, reklama qilingan kiyimni sotib olish uchun 1 million so‘mni ular ko‘rsatgan karta raqamiga o‘tkazib bergan. Biroq pul o‘tkazilgach, barcha yozishmalar o‘chirilib, muloqot to‘xtatilgan.

Dastlabki tergov jarayonida aniqlanishicha, so‘nggi bir oy davomida ular fuqarolarning jami 279 ta bank plastik kartalaridan aldov yo‘li bilan 101 million so‘mdan ortiq mablag‘larni qabul qilib olgan.

Mazkur holat yuzasidan ushbu shaxslarga nisbatan Jinoyat kodeksining 168-moddasi 3-qismi bo‘yicha jinoyat ishi qo‘zg‘atildi. Tergov harakatlari davom etmoqda.

Tayyorlagan: Отабек Матназаров

#Toshkent viloyati #firibgarlik #onlayn do‘kon