Maktablar o‘rtasida prezident sovrini uchun tanlov o‘tkaziladi

Nashrda O‘zbekistonda ta’lim tizimida keng ko‘lamli o‘zgarishlar amalga oshirilayotgani, so‘nggi taqdimotda prezidentga yangi taklif va rejalar taqdim etilgani ma’lum qilingan.

Ma’naviy-ma’rifiy ishlarni rivojlantirish, maktab o‘quvchilarining bo‘sh vaqtini mazmunli o‘tkazish yo‘nalishlardan biri bo‘lishi alohida ta’kidlandi. Shu maqsadda ta’limning barcha bo‘g‘inlarini qamrab oladigan, maktab, kollej va oliy o‘quv yurtlari uchun uslubiy qo‘llanmaga aylanadigan yagona milliy g‘oya konsepsiyasi ishlab chiqildi.

Uning asosida o‘quvchilarning iqtidor va tashabbuslarini qo‘llab-quvvatlashning vertikal tizimi yaratilmoqda. Bir qator mavjud muassasalarda "Kelajak" markazlari ochiladi, maktablarda o‘quvchilar tashabbuslari bilan ishlash bo‘yicha maslahatchi lavozimi tashkil etiladi.

"Dasturning muhim qismi texnik va muhandislik ta’limini rivojlantirishdan iborat bo‘ladi. 14 ta hududda ixtisoslashtirilgan muhandislik maktablari ochiladi, ularda ta’lim bepul va raqobatbardosh bo‘ladi. O‘quv jarayoni STEM modeli asosida tashkil etiladi. 2026 yildan boshlab, har yili umumta’lim maktablari o‘rtasida O‘zbekiston prezidenti sovrini uchun "Ilg‘or muhandislik maktabi" milliy tanlovi o‘tkaziladi", – deya xabar qilgan "Karavan info".