Shveytsariya elchisi: Jinoiy manbalardan olingan mablag‘larni O‘zbekistonga qaytaryapmiz 

Unga ko‘ra, e’lon qilingan natijalar katta taassurot qoldirgan. Qancha odam kambag‘allikdan qutulganligi, yangi iqtisodiy va ijtimoiy ko‘mak ko‘rsatilayotgani, munosib hayot kechirish uchun yaratilayotgan sharoitlar haqidagi ma’lumotlar ham juda muhim.

"Bu jarayonda Shveytsariya ham faol ishtirok etmoqda. Biz jinoiy manbalardan olingan mablag‘larni O‘zbekistonga qaytaryapmiz va bu mablag‘lar kambag‘allikni qisqartirishga bevosita hissa qo‘shadigan ijtimoiy loyihalarni amalga oshirishga sarflanmoqda. Masalan, bugun O‘zbekistonda 45 dan ortiq maktabni modernizatsiya qilish loyihasi bo‘yicha hujjat imzolanadi. Bu sanitariya-gigiyena sharoitlari – hojatxonalar, yuvinish xonalarini yaxshilash, binolarning energiya samaradorligini oshirish bilan bog‘liq. Bularning barchasi xalq manfaati, mamlakat kelajagi uchun qilinmoqda", dedi elchi.

Mablag‘larni O‘zbekiston xalqiga qaytarish va jamiyat manfaati yo‘lida foydalanish haqidagi qaror Shveytsariya va O‘zbekiston hukumatlarining birgalikdagi irodasi natijasidir.

"Mamlakatda kambag‘allik darajasini pasaytirish bo‘yicha erishilgan natijalar ajoyib va bu nafaqat men, balki barcha forum ishtirokchilarini quvontirdi. Biz O‘zbekistonda har bir inson o‘z salohiyatini – iqtisodiy-ijtimoiy imkoniyatlarini ro‘yobga chiqarish va munosib hayot kechirish imkoniyatiga ega bo‘lishi tarafdorimiz", deydi Konstantin Obolenskiy.