Germaniya kasalxonalari Rossiya bilan urush holatida kuniga 1000 nafar yaradorni qabul qiladi

Germaniya qurolli kuchlari (Bundesver) NATO va Rossiya o‘rtasida keng ko‘lamli mojaro yuzaga kelgan taqdirda tibbiy yordam ko‘rsatish rejasini ishlab chiqmoqda. Mamlakat hospitallari kuniga 1000 ga yaqin yaralangan askarni davolashga tayyorlanmoqda, dedi Bundesver markaziy tibbiy xizmati rahbari Ralf Xoffman 22 sentabr, dushanba kuni chop etilgan Reuters agentligiga bergan intervyusida. Unga ko‘ra, kunlik kasalxonaga yotqizilganlar soni janglar shiddati va ishtirok etadigan harbiy qismlar va bo‘linmalarga bog‘liq bo‘ladi.

Agentlik ma’lumotlariga ko‘ra, Yevropa qurolli kuchlari 2022 yilda Rossiyaning Ukrainaga keng ko‘lamli bostirib kirishi ortidan Moskva bilan yuzaga kelishi mumkin bo‘lgan mojaroga tayyorgarlikni tezlashtirgan. Germaniya ham Ukrainadagi urush tajribasini hisobga olgan holda harbiy tibbiyot xodimlarini tayyorlashni doimiy ravishda takomillashtirmoqda. «Ukrainadagi urushning xarakteri keskin o‘zgardi», deb ta’kidladi general Xoffman o‘q jarohatlaridan portlash va uchuvchisiz uchoqlar hamda o‘q-dorilar tufayli kuyish jarohatlari ko‘payishiga ishora qilib. Uning qo‘shimcha qilishicha, ukrainaliklar ko‘pincha yarador askarlarni uchuvchisiz uchoqlar tufayli tezda evakuatsiya qila olmaydi, bu esa ularning ahvolini bevosita frontda uzoq vaqt barqarorlashtirishni talab qiladi.

Yaradorlarni tashish uchun nemis harbiylari kasalxona poyezdlari va avtobuslaridan foydalanishni, shuningdek, havo tibbiy evakuatsiyasini kengaytirishni ko‘rib chiqmoqda. Yaradorlarga birinchi yordam frontda ko‘rsatiladi, so‘ngra Germaniyaga, birinchi navbatda fuqarolik shifoxonalarida davolanish uchun olib ketiladi. Xoffmanning hisob-kitoblariga ko‘ra, Germaniyaning umumiy sig‘imi 440 000 ming kishilik kasalxonalarida taxminan 15 000 o‘rin kerak bo‘ladi. Hozirda taxminan 15 000 nafar kishiga ega Bundesverning Markaziy tibbiy xizmati kelajakdagi ehtiyojlarni qondirish uchun kengaytiriladi, deya qo‘shimcha qildi u.