NATO havo himoyasi bo‘yicha barcha zarur vositalarni qo‘llashga va’da berdi

23 sentabr, seshanba kuni Bryusselda bo‘lib o‘tgan yig‘ilish yakunlari bo‘yicha NATOning asosiy siyosiy qaror qabul qiluvchi organi bo‘lmish Shimoliy Atlantika kengashi: «Rossiya hech qanday shubhasiz bir narsani bilishi kerak: NATO xalqaro huquq normalariga muvofiq o‘zini himoya qilish va barcha yo‘nalishdagi tahdidlar oldini olish uchun barcha zarur harbiy va noharbiy vositalardan foydalanadi», deya ma’lum qildi. Dpa'ning qayd etishicha, hujjatda alyans hududida har qanday tahdidning oldini olish uchun nafaqat dronlar, balki Rossiya samolyotlari ham urib tushirilishi mumkinligi yana bir bor ta’kidlangan.

NATO Rossiya hujumlariga «qat’iy» javob beradi, deb va’da qildi ittifoqchilarning Yevropadagi birlashgan kuchlari qo‘mondoni, AQSh harbiy-havo kuchlari general-leytenanti Aleksus Grinkevich. Uning ta’kidlashicha, ittifoqchilar «Rossiyaning bu va boshqa mas’uliyatsiz harakatlari tufayli Ukrainani qo‘llab-quvvatlash bo‘yicha uzoq muddatli majburiyatlaridan voz kechmaydi».

Rossiyaning so‘nggi paytlarda NATO havo hududiga bostirib kirishi «Rossiyaning mas’uliyatsiz xatti-harakatlari kengroq namunasi»ning bir qismidir, deya ta’kidladi alyans Moskvani bunday harakatlarni to‘xtatishga chaqirib. Bunday harakatlar «eskalatsiya, noto‘g‘ri hisoblash xavfini keltirib chiqaradi va hayotga xavf tug‘diradi», deya qo‘shimcha qilindi NATOda.