Ukrainadagi urushda otliq bo‘linmalar paydo bo‘lishi mumkin

Rossiya hujum otryadlari otlardan faol foydalanishni boshlashi mumkin, deb yozadi «Kommersant». Ilgari ham bunday holatlar bo‘lgan, ammo bu kamdan kam uchragan. Hozirda Rossiya armiyasi «to‘laqonli otliq qo‘shinni qayta tiklashga urinmoqda».

Jangchilari allaqachon ot minishni o‘rganayotgan «Shtorm» maxsus topshiriqlar otryadi komandirining RT telekanaliga aytishicha, ot o‘z instinktlari tufayli minani bosib olishi ehtimoli odamnikiga qaraganda kamroq bo‘ladi, shuningdek, qorong‘ida yaxshiroq mo‘ljal oladi.

Hujum otryadlarining otlardan foydalanish taktikasi, komandirning so‘zlariga ko‘ra, quyidagicha bo‘lishi mumkin: bitta otda ikki kishi o‘tiradi, ulardan biri otni boshqaradi, ikkinchisi esa, zarurat bo‘lganda, o‘t ochishga mas’ul bo‘ladi. Shturm qilinayotgan joyida esa ular otdan tushib, jangga kirishadi.

Otlar yo‘lsiz joylarda yaxshi harakatlanadi, ulardan foydalanish magnit minalarining ishga tushish xavfini kamaytiradi (metall yo‘qligi sababli) – bu mobillik (harakatchanlik) va maxfiylikni ta’minlaydi. Biroq, qo‘shimcha qiyinchiliklar ham bor: otlarni o‘rgatish va boqish kerak, ularning yuk ko‘tarish qobiliyati mashinalarnikiga qaraganda ancha past. Shu sababli, ularning jang maydonida ommaviy qo‘llanishi ehtimoli juda kam, deb yozadi «Kommersant».

«Umuman olganda, otlarni zamonaviy jang maydoniga qaytarishga urinish ko‘p jihatdan ramziy ma’noga ega. Texnologik ishlanmalarni namoyish etish maydoniga aylangan harbiy harakatlar ishtirokchilari zamonaviy texnologiyalar zaif bo‘lib chiqqanda yana bazaviy vositalarga – muqobil telefon kabelini o‘rnatishdan tortib, yuk tashuvchi hayvonlar aravalarigacha murojaat qilishga majbur bo‘lmoqda», – deb yozadi «Kommersant».

Rossiyalik harbiylar oldin ham frontda shaxsiy harakatlanish vositalaridan – bir g‘ildirakli yo‘ltanlamaslar hamda qiyin yo‘llardan o‘tish qobiliyati yuqori bo‘lgan elektr samokatlardan ham foydalangan. Ushbu transport vositalaridan foydalanish piyodalarga qarshi minalardan jiddiy jarohat olish ehtimolini kamaytiradi.