Nukusda sog‘liqni saqlash sohasida AI Hackathon boshlandi

2 oktyabr kuni Qoraqalpog‘iston Respublikasi poytaxti Nukus shahrida “HealthTech AI Hackathon”ga start berildi. Tadbir mamlakatda sun’iy intellekt yo‘nalishida o‘tkazilayotgan umummilliy xakaton loyihasining ilk bosqichi hisoblanadi.

AI Hackathon loyihasi 2025 yilning oktyabridan 2026 yil dekabr oyigacha bosqichma-bosqich amalga oshirilib, mamlakatning barcha 14 mintaqasini qamrab oladi.

“HealthTech AI Hackathon”ning asosiy maqsadi tibbiyot sohasida raqamli islohotlarni jadallashtirish bo‘lib, unda IT va tibbiyot yo‘nalishidagi talabalar, yosh shifokorlar, mutaxassislar hamda tibbiyot muassasalari vakillari ishtirok etmoqda. Ular uchun mahorat darslari va mentorlik sessiyalari o‘tkaziladi.

Xakatonda 26 ta jamoadan iborat 100 dan ortiq ishtirokchilar tomonidan sog‘liqni saqlash tizimi uchun zamonaviy raqamli yechimlar ishlab chiqiladi. Loyihalar shifokorlar, vazirlik vakillari va IT sohasi yetakchilaridan iborat ekspertlar hay’atiga taqdim etiladi.

Eng yaxshi g‘oyalar grantlar, akseleratsiya va inkubatsiya dasturlari orqali qo‘llab-quvvatlanadi. Shuningdek, g‘oliblar venchur fondlaridan investitsiya jalb qilish imkoniyatiga ega bo‘ladi.

Mutaxassislar fikricha, tibbiyotni raqamlashtirish orqali kasalliklarni erta aniqlash, surunkali xastaliklarni bashorat qilish, teletibbiyot xizmatlarini kengaytirish va salomatlikni real vaqtda kuzatish imkoniyati yaratiladi. Loyiha Sog‘liqni saqlash vazirligi, Raqamli texnologiyalar vazirligi, Oliy ta’lim, fan va innovatsiyalar vazirligi, Maktabgacha va maktab ta’limi vazirligi, Yoshlar ishlari agentligi, Jo‘qorg‘i Kenges, IT Park Uzbekistan va Uzinfocom tomonidan tashkil etilgan. Tashabbusga Yandex Uzbekistan, Uzum, Click, ZTE, Central Asian University, New Uzbekistan University va AKFA kabi yirik kompaniyalar ham ko‘mak bermoqda.