HAMAS G‘azodagi barcha garovga olinganlarni ozod etishga tayyorligini ma’lum qildi

HAMAS jangchilari Trampning almashuv formulasiga ko‘ra, omon qolgan barcha garovga olinganlar va jasadlarni Isroilga topshirishga tayyorligini ma’lum qildi. AQSh prezidenti Isroilni G‘azo sektorini o‘qqa tutishni to‘xtatishga chaqirdi.

Foto: Jack Guez/AFP/Getty Images

Falastinning HAMAS harakati AQSh prezidenti Donald Trampning tinchlik rejasi doirasida G‘azo sektoridagi barcha garovga olinganlarni ozod qilishga tayyorligini ma’lum qildi. Bu haqda 3 oktyabr, juma kuni AFP axborot agentligi va Al Jazeera telekanali xabar berdi. Amerika yetakchisi HAMASning Tramp tashabbusiga javob matnini Truth Social ijtimoiy tarmog‘ida e’lon qildi.

Jangchilar «almashinuv uchun zarur shart-sharoit yaratilsa» barcha tirik qolganlar va jasadlarni «prezident Tramp taklif qilgan almashinuv formulasiga muvofiq» Isroilga topshirishga rozi bo‘ldi. «Harakat ushbu kelishuv tafsilotlarini muhokama qilish uchun vositachilar orqali zudlik bilan muzokaralarni boshlashga tayyorligini tasdiqlaydi», deya ma’lum qildi HAMAS.

Guruh, shuningdek, G‘azo sektori boshqaruvini «Falastin milliy konsensusi hamda arab va islom ko‘magi asosida» mustaqil organga o‘tkazishga kelishib oldi.

Ayni paytda harakat siyosiy byurosi a’zosi Muso Abu Marzuqning ta’kidlashicha, garovga olinganlar va halok bo‘lganlarni 72 soat ichida topshirish «hozirgi sharoitda real emas, nazariy masala».

Shu bilan birga, harakat rejada nazarda tutilganidek, qurolsizlanish masalasini hal qilmadi. Qatardagi HAMAS yetakchilari AQSh prezidenti tashabbusining ayrim shartlarini o‘zgartirishni talab qilmoqda.

Tayyorlagan: Отабек Матназаров

#Isroil #Falastin #G‘azo #HAMAS

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.