Qirg‘izistonda o‘lim jazosining tiklanishi umumxalq referendumida hal qilinishi mumkin

Qirg‘izistonda ayollar va bolalarga qarshi og‘ir jinoyatlar uchun o‘lim jazosining tiklanishi masalasi umumxalq referendumida hal qilinishi mumkin. Bu haqda prezident Sadir Japarov ma’lum qildi.

«Biz bu masalani yakka hal qilmaymiz. Xalq bilan maslahatlashamiz. Masala umumxalq referendumiga qo‘yilishi mumkin. Agar ko‘pchilik qo‘llab-quvvatlasa, unda Konstitutsiya va qonunlarga o‘zgartirishlar kiritish, shuningdek, xalqaro majburiyatlarni qayta ko‘rib chiqish kerak bo‘ladi», dedi davlat rahbari.

Prezident ayollar va bolalarni zo‘ravonlikdan himoya qilish ustuvor vazifa bo‘lib qolayotganini, bunday shov-shuvli masala bo‘yicha qaror faqat xalq tomonidan qabul qilinishi kerakligini qo‘shimcha qildi.

Qirg‘izistonda ayollar va bolalarga qarshi og‘ir jinoyatlar uchun o‘lim jazosining tiklanishi masalasi sentabr oyi oxirida o‘ta shafqatsizlik bilan o‘ldirilgan 17 yoshli Aysulu Mukashevaning fojiali o‘limidan keyin ko‘tarildi.

Prezident so‘zlariga ko‘ra, u tergovni shaxsan o‘z nazoratiga olgan va ma’muriyatga o‘lim jazosini tiklash uchun qonunlarga o‘zgartirishlar tayyorlashni topshirgan. Sadir Japarov voyaga yetmaganlar va ayollarni o‘ldirish va zo‘rlash bilan bog‘liq jinoyatlar soni ortib borayotgani, «an’anaviy» qamoq muddatlari endi jinoyatchilarni to‘xtata olmayotganini ta’kidladi.

Shu bilan birga, u korrupsion jinoyatlar o‘lim jazosiga tortilishi mumkin emasligini, gap faqat shafqatsiz qotillik va pedofiliya haqida ketayotganini ta’kidladi.