Mask Marsdagi koloniya uchun minimal qancha kishi kerak bo‘lishini hisoblab chiqdi

Uning bayonotiga Ars Technica sharhlovchisi Erik Berger bilan X ijtimoiy tarmog‘idagi muhokama sabab bo‘lgan. Jurnalist Starship transport tizimi loyihasi istiqboliga shubha bilan qaradi, biroq bu kema bugungi kunda odamlarni Yer orbitasidan tashqariga olib chiqishga qodir yagona nomzod bo‘lib qolayotganini tan oldi. Mask Starship muvaffaqiyatiga ishonchi komil ekanligini va boshqa sayyoralarni kolonizatsiya qilish uchun aniq «yo‘l xaritasi»ni allaqachon shakllantirayotganini aytdi.

SpaceX rahbarining so‘zlariga ko‘ra, Marsga qo‘nishning o‘zi yetarli emas. O‘zini o‘zi ta’minlash va koloniyani rivojlantirish uchun sharoit yaratish kerak. Bunga erishish uchun Maskning fikricha, missiya ishtirokchilarining minimal soni 100 000 atrofida bo‘lishi kerak — bu hamjamiyatning o‘zini o‘zi ta’minlashi uchun zarur bo‘lgan raqam.

Odamlardan tashqari, Yerdan kamida bir million tonna asbob-uskunalar va resurslar yetkazilishi kerak bo‘ladi. «Marsdagi hamjamiyatning omon qolishi va hatto Yerdan ta’minoti uzilgan taqdirda ham gullab-yashnashi juda muhim», deb ta’kidladi Mask. Uning so‘zlariga ko‘ra, bu juda muhim chegara bo‘lib, undan oshib ketish Mars kolonizatsiyasini haqiqatga aylantiradi.