Samarqand shahrida YuNeSKO ishlari bo‘yicha milliy komissiyalarning 12-yig‘ilishi o‘z ishini boshladi. Tadbir YuNeSKO bosh konferensiyasining 43-sessiyasi doirasida o‘tmoqda.
Anjumanda tashkilot kun tartibidagi dolzarb yo‘nalishlar — yoshlar siyosati rivojlanishi, davlatlar, fuqarolik jamiyati va xususiy sektor o‘rtasida hamkorlikni kuchaytirish, barqaror rivojlanish hamda inklyuzivlik masalalari ko‘rib chiqilmoqda.
Yig‘ilishni YuNeSKO bo‘yicha O‘zbekiston milliy komissiyasi raisi Gayane Umerova ochib berdi va yig‘ilish raisi etib saylandi. U o‘z nutqida kun tartibining mazmunan boyligi va YuNeSKO faoliyati uchun muhim yo‘nalishlarni qamraganini ta’kidladi.
Anjuman doirasida ishtirokchilar amaliy taklif va tashabbuslarni muhokama qilishi, shuningdek, hamkorlikni yanada mustahkamlash bo‘yicha kelishuvlarga erishishi kutilmoqda.
