Najmiddin Qosimhojiyev taekvondo bo‘yicha jahon chempioni bo‘ldi

O‘zbekiston so‘nggi 10 yil ichida ilk marta taekvondo bo‘yicha jahon chempionatida oltin medalni qo‘lga kiritdi. 21 yoshli Najmidddin Qosimhojiyev Dmitriy Shokindan (2015) so‘ng jahon chempioniga aylangan o‘zbekistonlik ikkinchi taekvondochiga aylandi.

Foto: @uzbtaekwondowt

Taekvondo WT bo‘yicha O‘zbekiston milliy jamoasi a’zosi Najmiddin Qosimxojiyev (-74 kg) Xitoyning Usi shahrida o‘tkazilgan jahon chempionatida oltin medalni qo‘lga kiritdi. U final bahsida Olimpiya o‘yinlari va jahon chempionati sovrindori, braziliyalik Edival Pontesni mag‘lub etdi.

O‘zbekiston milliy jamoasi jahon chempionatini 1 ta oltin, 1 ta kumush va 1 ta bronza medali bilan nihoyasiga yetkazib, umumjamoa hisobida beshinchi bo‘ldi. O‘zbekistonliklar safida Svetlana Osipova (+73 kg) kumush medalni, Jahongir Xudoyberdiyev (-54 kg) bronza medalni qo‘lga kiritdi.

So‘nggi bor o‘zbekistonlik sportchilar taekvondo bo‘yicha jahon chempionatida 2015 yilda zafar quchgan edi. Rossiyaning Chelyabinsk shahrida o‘tkazilgan musobaqada Dmitriy Shokin (+87 kg) oltin medalni qo‘lga kiritdi.

Usi-2025 umumjamoa hisobida Turkiya g‘alaba qozondi (3 oltin + 2 kumush + 1 bronza). Janubiy Koreya (2-2-2) ikkinchi, Braziliya (2-2-0) uchinchi bo‘ldi.

Tayyorlagan: Сардор Юсупов

#Taekvondo #Najmiddin Qosimxojiyev