Toshkentda Gentra haydovchisi YPX xodimini kapotida sudrab ketdi. Uning hisobida 144 ta qoidabuzarlik borligi aniqlangan

Ijtimoiy tarmoqlarda Toshkent shahrida haydovchi YPX xodimini avtomashina kapoti ustida sudrab ketgani aks etgan yana bir video tarqaldi.

Hodisa 2 noyabr kuni Yashnobod tumani Farg‘ona yo‘li ko‘chasida sodir bo‘lgan. Kun.uz’​​ga ma’lum bo‘lishicha, Gentra haydovchisi avvaliga YPX xodimining to‘xtash ishorasiga bo‘ysunmay, harakatni davom ettirgan. So‘ngra xodim Gentra’​​ning ortidan borgan va uni to‘xtatib, haydovchidan hujjatlarini so‘ragan. Shu vaqtda haydovchi YPX xodimini kapot ustida bir necha o‘n metrga sudrab ketgan.

Qoidabuzar boshqa haydovchilar yordamida to‘xtatilgan.

Davlat yo‘l harakati xavfsizligi xizmati axborot xizmati rahbari Zoyir Yo‘ldoshev hodisa yuzasidan ma’lumot berdi. Uning so‘zlariga ko‘ra, bu holatda inspektor Otabek Mahmudov jarohatlanmagan, ammo o‘sha vaziyatda uning hayoti xavf ostida qolgandi.

Surishtiruvlar davomida aniqlanishicha, 24 yoshli haydovchi ushbu avtomashinasida jami 144 ta qoidabuzarlik sodir etgan bo‘lib, shundan 38 tasining muddati o‘tgan, 30 tasi MIB organlariga o‘tkazilgan. Uning hozirda jarimalardan umumiy qarzi 18 mln 90 ming so‘mni tashkil qiladi.

Haydovchi shu kunning o‘zidayoq qo‘lga olinib, unga nisbatan Yashnobod tumani prokuraturasi tomonidan Jinoyat kodeksining 219-moddasi (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilgan.

Qonunbuzarga bazaviy hisoblash miqdorining 50 baravaridan 100 baravarigacha miqdorda jarima yoki 360 baravarigacha majburiy jamoat ishlari yoxud 3 yilgacha axloq tuzatish ishlari yoki 1 yildan 3 yilgacha ozodlikni cheklash yoki 1 yildan 3 yilgacha ozodlikdan mahrum qilish jazosi tayinlanishi mumkin.

YHXB matbuot xizmatiga bergan intervyusida qo‘lga olingan shaxs «vaziyat bu qadar chuqurlashib ketadi deb o‘ylamagani», qilgan ishidan afsusda ekani va boshqa haydovchilarga bunday qilishni maslahat bermasligini aytgan. U ko‘ziga yosh olib, boshqa bunday qilmaslikka va’da bergan.