Apple Magic Mouse’ga haqiqiy raqobatchi paydo bo‘ldi

Yaponiyaning Melt Interface kompaniyasi yangi Melt Mouse sensorli sichqonchasini namoyish etdi. Yangi qurilma dizayn va qulaylik jihatidan Apple Magic Mouse’dan ancha ustun hisoblanadi.

Melt Mouse’ning eng katta afzalligi — u zaryad olayotganda ham ishlaydi, ya’ni endi uni “teskari qilib qo‘yish” shart emas. Sichqoncha mat sensor panelga ega bo‘lib, u barmoq izlarini qoldirmaydi va suyuq harakatni ta’minlaydi. An’anaviy “chert” tovushi o‘rniga u vibratsiya orqali bosim hissini taqdim etadi, bu esa ish jarayonini jim va qulay qiladi.

Qurilma ichiga joylashtirilgan raqamli Numpad paneli 12 ta yoritilgan nuqta orqali raqam va belgilarni namoyon etadi. Shu bilan birga, sichqoncha ergonomik shaklga, USB-C porti, 6000 DPI sezgirlik darajasi va bir oygacha avtonom ishlash imkoniyatiga ega. Shuningdek, u bir vaqtning o‘zida uchta qurilmaga ulanishi mumkin (Bluetooth LE orqali).

Narxi — 280 dollar, sotuvlar 2026 yil sentabrda boshlanadi.

Raqamli dunyoda adashib qolmaslik va shunday yangiliklardan birinchilardan bo‘lib xabardor bo‘lish uchun KUN.UZ Texnologiya nomli Telegram va techno.kun.uz Instagram sahifasini kuzatib boring.