Avstriyada ehtimoliy rossiyalik josus fosh etildi

Gumonlanuvchi shaxs Avstriyaning suvlarni tozalash tizimiga kirishga uringani aytilmoqda. Avstriya razvedkasi Sergey K. bo‘yicha tergov olib borilayotganini tasdiqladi.

Foto: Shutterstock

Avstriya razvedkasi mamlakatning suvlarni tozalash tizimiga kirishga urinib, ehtimoliy rossiyalik josus sifatida tilga olinayotgan Sergey K.ga nisbatan tergov olib bormoqda. Bu haqda 4 noyabr kuni AFP agentligiga Avstriya Davlat xavfsizligi va razvedka boshqarmasi (DSN) xabar berdi.

Jetzt.at surishtiruv portali ma’lumotlariga ko‘ra, gap Rossiya harbiy razvedkasining xodimi haqida ketmoqda.

Tergovchilar ta’kidlashicha, Sergey K. 2021 yilgacha muhandislik sohasida ishlagan va Avstriya hamda qator boshqa mamlakatlarga soxta hujjatlar bilan taxminan 10 marotaba kelgan.

Jetzt.at materialida aytilishicha, Avstriyada gumonlanuvchi VTA kanalizatsiya (chiqindi suv) tozalash kompaniyasi ichida aloqalar o‘rnatgan. Bundan tashqari, Sergey K. Rossiyada ham xuddi shu nomdagi (VTA) va suvlarni tozalashga ixtisoslashgan kompaniyalardan birida ishlagan.

«Hatto Rossiya maxsus xizmatlari Avstriyadagi kanalizatsiya tizimlarini manipulyatsiya qilishni maqsad qilmagan taqdirda ham, Sergey K. VTA atrofida strategik qulay pozitsiyani egallagan. Kompaniya butun dunyo bo‘ylab, jumladan Ukrainaga ham suvlarni tozalash texnologiyalarini yetkazib beradi. Rossiyaning tajovuzkor urushi boshlanganidan beri u yerda suv ta’minoti va kanalizatsiya infratuzilmalari ataylab yo‘q qilinmoqda», — deyiladi surishtiruvda. Unda Bellingcat loyihasi tadqiqot jurnalisti Xristo Grozev ham ishtirok etgani qayd etilgan.

Avstriyalik VTA kompaniyasi asoschisi va egasi Ulrix Kubinger AFP'ga bildirishicha, taxminan ikki hafta oldin shu nomdagi Rossiya kompaniyalari mavjudligi ma’lum bo‘lganidan so‘ng, huquq-tartibot idoralariga ariza berilgan. U bu Rossiya kompaniyalarining Avstriyaning VTA'si bilan hech qanday aloqasi yo‘qligini urg‘uladi.

YeI a’zosi, biroq NATOga a’zo bo‘lmagan Avstriya so‘nggi paytlarda josuslik bo‘yicha nisbatan yumshoq qonunchilikka ega ekani uchun NATO davlatlari tomonidan bir necha bor tanqid qilingan. AFP ta’kidlashicha, bu holat Rossiya razvedkachilarini mamlakatga jalb qilishi mumkin.

Joriy yil sentabr oyida Avstriyaning OMV neft-gaz konsernida ham ehtimoliy rossiyalik josus fosh etilgan edi.