Volgogradda Ukraina dronlari zarbasidan so‘ng “Lukoyl” neft konserni tarkibiga kiradigan neftni qayta ishlash zavodi ishini to‘xtatdi. Hujum natijasida ikki qurilma shikastlandi — kuniga 9100 tonna (66 700 barrel) quvvatga ega neftni birinchi qayta ishlash qurilmasi va kuniga 11 ming tonna quvvatli gidrokreking qurilmasi, deb yozadi 6 noyabr kuni Reuters uch xabardor manbaga tayanib.
Agentlik suhbatdoshlaridan biri anonimlik shartida ma’lum qilishicha, birinchi qayta ishlash qurilmasida yong‘in chiqqan, gidrokreking qurilmasi ham shikastlangan. “Lukoyl” matbuot xizmati Reuters’ning so‘roviga javob bermagan.
Avvalroq Volgograd viloyati gubernatori Andrey Bocharovning aytishicha, Ukraina dronlarining kechagi tungi hujumi oqibatida Volgogradda 24 qavatli turar joy binosiga shikast yetgan, shuningdek Krasnoarmeyskiy tumani sanoat zonasi hududida yong‘in kelib chiqqan. Hujum natijasida 48 yoshli erkak halok bo‘lgan.
Volgogradda “LUKOYL-Volgogradneftepererabotka” korxonasi joylashgan — u RFning Ukrainaga qarshi keng ko‘lamli urushi boshlangandan buyon bir necha bor ukrain dronlari hujumlariga uchragan. Reuters’ning qayd etishicha, 2024 yilda Volgograd NQZ 13,7 mln tonna neftni qayta ishlagan — bu Rossiya umumiy neft qayta ishlash hajmining 5,1 foiziga to‘g‘ri keladi.
Oktyabr oyi oxirida Ukraina rasmiylari yil boshidan beri Rossiyaning neft obektlariga 160 ta samarali zarba berilganini ma’lum qilgan edi.
