Yig‘ilishda tibbiy ta’lim va kadrlar sifatini oshirish maqsadida uch bosqichli baholash tizimini joriy etish belgilab olindi.
Bakalavr bosqichida talabalarning fundamental va klinik fanlar bo‘yicha bilimlari baholanadi.
Rezidenturani tugatgan vrachlar o‘z ixtisosi bo‘yicha imtihon topshiradi.
Imtihondan so‘ng mutaxassis davlat ro‘yxatidan o‘tadi va unga tibbiy faoliyat yuritishga ruxsat beriladi.
Shuningdek, tibbiy xizmatning eng yaqin bo‘g‘ini — hamshiralar tayyorgarligini zamonaviy talablarga moslashtirish zarurligi qayd etildi. Endilikda oddiy muolajani bajarish bilan cheklanmay, tashxis, davolash va profilaktikada shifokorga ko‘maklasha oladigan hamshiralarni tayyorlashga o‘tiladi.
Bu maqsadda Hamshiralar akademiyasi Toshkent davlat tibbiyot universiteti tasarrufiga o‘tkazilib, uning negizi asosida Oliy kasbiy tibbiyot akademiyasi tashkil etiladi. Akademiya AQSh, Germaniya, Buyuk Britaniya oliygohlari bilan hamkorlikda kelasi o‘quv yilidan boshlab oliy ma’lumotli hamshiralar tayyorlashni yo‘lga qo‘yadi.
Kutilishicha, yangi tizim kadrlar sifatini oshiradi, bemorga xizmat ko‘rsatishning klinik samaradorligini va jamoat salomatligiga ta’sirini kuchaytiradi.
