Tibbiyot markazlari shaxsiy mulk emas: rahbarlarga bir yillik «katta reja» talabi qo‘yildi 

Sog‘liqni saqlash bo‘yicha yig‘ilishda Respublika onkologiya markazidagi boshqaruv o‘zgarishi va xorij tajribasini keng joriy etish masalalari muhokama qilindi. Yaqinda markaz rahbari lavozimidan ozod etildi, o‘rniga Turkiyada malakaga ega boshqaruvchi tayinlandi. Shu bilan birga, Fransiyaning jahonda tan olingan Gustav Roussy klinikasi hamkor sifatida jalb etildi, ularning klinik protokollarini milliy amaliyotga bosqichma-bosqich tatbiq etish rejalashtirilgan.

Prezident markazlar faoliyati yuzasidan qat’iy pozitsiyani bildirdi:

«Barcha markaz rahbarlari eshitib olsin: markazlar shaxsiy mulk emas, ularning barchasi davlatniki, xalqniki! Har bir markaz rahbari xulosa chiqarib, o‘ziga bir yillik katta reja olishi kerak. Ular uch oyda xorijdan hamkor topib, o‘zi o‘zgarish qiladi yoki bu ishni ularsiz qilamiz».

Yig‘ilishda sohadagi boshqa tizimli muammolar ham ko‘tarildi. Viloyat, tuman tibbiyot rahbarlari va oilaviy poliklinika mudirlarida eskicha yondashuv saqlanayotgani, hududlarga katta mehnat bilan yetkazilgan qimmatbaho uskunalar to‘liq quvvatda ishlamasa-da, ba’zilari hanuz qadog‘idan chiqarilmagani tanqid qilindi.

Aniq misollar keltirildi: Gurlan tumani shifoxonasiga 300 ming dollarga olingan MSKT apparati atigi 9 foiz yuklamada ishlayapti. Navoiy viloyat shoshilinch markazida taxminan 1 mln dollarlik angiograf ham bor-yo‘g‘i 4 foiz quvvat bilan faoliyat ko‘rsatmoqda. Mutasaddilarga xususiy klinikalar tajribasini o‘rganib, yuqori texnologiyali uskunalardan samarali foydalanishni yo‘lga qo‘yish vazifasi qo‘yildi.