Zelenskiyning aytishicha, u mamlakatini RFning tungi dronlar hujumlaridan himoya qilish maqsadida xalqaro hamkorlar bilan ishlayapti. Ammo hozircha Buyuk Britaniya va boshqa ittifoqchilar Kiyevning uzoq vaqtdan beri kiritayotgan so‘roviga qaramay, mamlakatning markaziy va g‘arbiy qismi ustida havo patruli uchun o‘z harbiy samolyotlarini yuborishdan bosh tortyapti.
YeI va Buyuk Britaniya yordami yetarlimi, degan savolga Zelenskiy shunday javob berdi: «U hech qachon yetarli emas. Yetarli qachon bo‘ladi — urush tugaganda. Va yetarli qachon bo‘ladi — Putin to‘xtashga majbur bo‘lganini tushunganda». Shu bilan birga, u Buyuk Britaniya bosh vaziri Kir Starmer bilan iliq munosabatlarini ta’kidlab, Kiyevga yordam yetishmasligida vaziyat shaxsan Starmerga bog‘liq emasligini qayd etdi.
The Guardian eslatishicha, AQSh prezidenti Donald Tramp mamlakatining harbiy ishtirokini istisno qilgach, Fransiya va Buyuk Britaniya ehtimoliy tinchlik kelishuvi doirasida o‘z harbiylarini Ukrainaga yuborishga va’da bergan. «Buyuk Britaniya harbiylari oldinroq kelib, masalan, Ukraina–Belarus chegarasida mudofaa pozitsiyalari egallashini istarmidingiz?» degan savolga Zelenskiy: «Albatta. Biz ko‘p narsalarni so‘raganmiz, shu jumladan qurol-yarog‘ va YeI hamda NATOga a’zo bo‘lishni», — deb javob berdi.
Shu bilan birga, u Yevropa davlatlarining Ukrainada qurollar masalasiga, janglar davom etayotgan bir paytda, ehtiyotkorlik bilan yondashayotganini aytdi. «Liderlar o‘z jamiyatlaridan qo‘rqadi. Ular urushga chalg‘ishni xohlamaydi», — dedi Zelenskiy. Unga ko‘ra, qo‘shin joylashtirish haqidagi qarorni ayni davlatlarning o‘zi qabul qilishi lozim.
U haddan tashqari bosim o‘tkazsa, Kiyev «hamkorlarining moliyaviy va harbiy yordamini yo‘qotish xavfiga duch kelishi» mumkinligini ham qayd etdi.
Intervyuning keyingi qismida Zelenskiy Ukrainadagi urush tugamasidan oldin ham Rossiya Yevropaning boshqa bir mamlakatiga qarshi «ikkinchi front» ochishi mumkinligini bildirdi. Polsha ustida, shuningdek, Bryussel, Kopenhagen va Myunxen aeroportlari yaqinida paydo bo‘lgan noaniq dronlarni u frontda sezilarli ilgarilay olmayotgan Rossiyaning boshqa hududlarni «qidirishi» mumkinligi bilan bog‘ladi.
8 noyabr kuni Ukrainadagi yirik elektr energetika korxonalaridan biri — “Tsentrenergo” Facebook’da Rossiyaning tungi havo zarbasidan so‘ng barcha IES ishdan to‘xtaganini ma’lum qildi. 9 noyabrda mamlakatning qator hududlarida vaqtincha elektr uzilishlari kuzatildi.
