Toshkentda saqlash qoidalariga rioya etilmagan dori vositalari fosh etildi

Bosh prokuratura huzuridagi Departamentning Uchtepa tumani bo‘limi hamda Bojxona organlari xodimlari hamkorligida o‘tkazilgan tezkor tadbirda qonunga xilof ravishda dori vositalari savdosi bilan shug‘ullanib kelgan fuqaro D.N. qo‘lga olindi.

Ma’lumotlarga ko‘ra, u xorijda ishlab chiqarilgan, tegishli hujjatlari mavjud bo‘lmagan 9 turdagi jami 542 quti dori vositalarini fuqaro B.S.ga 6 400 AQSh dollariga sotgan vaqtda ashyoviy dalillar bilan ushlangan.

Ekspertiza xulosalariga ko‘ra, ashyoviy dalil sifatida olingan dori vositalariga muvofiqlik sertifikatlari rasmiylashtirilmagani, shuningdek ularni saqlash uchun belgilangan me’yor va talablarga rioya etilmagani aniqlangan.

Hozirda ushbu holat yuzasidan Jinoyat kodeksining tegishli moddasi bo‘yicha jinoyat ishi qo‘zg‘atilib, tergov harakatlari olib borilmoqda.